अमेरिका । सञ्चारकर्मी जाङ्वु शेर्पा गीतकारका रुपमा उदाएका छन् । लामो समयदेखि अमेरिका बस्दै आएका जाङ्बुले आफ्नो एल्बम माइ वर्ड्समा विभिन्न शैलीका आधा दर्जन गीत समेटेका छन् । प्रायः गीत सेन्टिमेन्टल छन् भने एउटा गीतमा ल्होसारको लयमा जन्मथलो सोलु परिवेश र संस्कृतिको वर्णन छ ।
एघार वर्ष सञ्चार क्षेत्रमा बिताएका जाङ्बुले एल्बमको औपचारिक विमोचन भने गरेनन् । ‘गीतसंगीतमा विदेशमा बसेका पैसावालले लगानी गरेको या गीतलाई सस्तो बनाएको आरोप सुनेको छु’, उनी भन्छन्, ‘भावना सबैसंग हुन्छ । मलाई पनि मुलुक छाड्नुपर्दाको अनुभूतिले गीतकार बनायो ।’
त्यसो त जाङ्बु आफूलाई सौखिन गीतकार मात्र ठान्छन् । मनोरञ्जन पत्रकारिताका क्रममा गायक गायिका र संगीतकारहरुसंग उठबस गर्दा गीत कोर्ने रहर लागेको उनले सुनाए । भन्छन्, ‘सिर्जना क्षेत्रमा कुनै पनि मानिस एकैचोटी व्यवसायिक भएर आउंदैन् । प्रोफेसनल र कमर्सियल भन्ने विल्कुल दुई फरक पाटो हुन् ।’
एल्बममा हरि लम्साल, कालिप्रसाद बास्कोटा, लक्ष्मण शेष, बबी घतानीको संगीत छ भने निशा देशार, विश्व नेपाली, यम बराल, सन्तोष लामा, सनुप पौडेल र मेघ लामाले स्वर दिएका छन् ।
कथा, कविता लेख्नुभन्दा गीत लेख्नुमा सार्थकता देखेका छन् उनले । ‘किनभने गीत जसले पनि सुन्छ, जसले पनि गुन्गुनाउछ । मिडियाको फेभरेट पनि त्यही छ । कति मेरा कुरा समाजका हुन्छन्, कति समाजका कुरा मेरा हुन्छन्’, उनी भन्छन्, ‘चौरीको लेक, धूपीको बोट, हिमाली हावाको कुरा अझै गीतमा समेटिन बांकी छ ।’
