सरकारले अर्को नीतिगत निर्णय नभएसम्म भन्दै मलेसिया र खाडीका पाँच देशमा महिला घरेलु कामदार पठाउन रोक लगाएको छ । सरकारले नेपाली महिला घरेलु कामदार सबैभन्दा बढी समस्यामा रहेको कुवेतलाई भने प्रतिबन्धित गरेको छैन ।
श्रम तथा रोजगार मन्त्रालयले ‘अर्को नीतिगत निर्णय नभएसम्म’ भन्दै मलेसिया, कतार, युनाइटेड अरब इमिरेट्स (युएई), ओमान, बहराइन र साउदी अरबमा महिला तथा पुरुष दुई किसिमका घरेलु कामदार पठाउन रोक लगाएको हो ।
दलालहरूले नेपाली महिला कामदारलाई अवैध रूपमा साउदी अरब र इराक पु¥याउन ‘ट्रान्जिट’ बनाइरहेको कुवेत भने तत्काललाई सरकारी प्रतिबन्धमा परेको छैन । नेपालीहरू घरेलु कामदारका रूपमा जाँदै नजाने मलेसियामा भने रोक लगाइएको छ ।
श्रम तथा रोजगार राज्यमन्त्री टेकबहादुर गुरुङले भदौ ११ गते गरेको उक्त निर्णय कार्यान्वयमा ल्याउन परराष्ट्र मन्त्रालयमार्फत सम्बन्धित देशका नेपाली नियोगमा पत्राचार भइसकेको स्रोतले बतायो । मन्त्रालयले भने वैदेशिक रोजगारलाई व्यवस्थित गर्न रोक लगाएको जनाएको छ । घरेलु कामदारलाई संस्थागत गर्ने विषयमा बनेको कार्यदलको प्रतिवेदनपछि खुल्ला गरिने मन्त्रालयले जनाएको छ ।
श्रमले परराष्ट्रमार्फत सम्बन्धित गन्तव्य मुलुकका सरकारसमक्ष पनि नेपाली नागरिकको नाममा घरेलु कामदारको भिसा जारी नगरिदिन आग्रह गरेको छ ।
सरकारले द्वन्द्व चर्किएपछि इराकमा कामदार जान प्रतिबन्ध लगाएको थियो । साउदी अरबमा समेत घरेलु कामदारको अवस्था दयनीय हुन थालेपछि केही वर्षयता त्यहाँ जान रोक छ । दलालहरूले भने वैधानिक रूपमा खुला रहेको कुवेत लग्ने भन्दै नेपाली महिलालाई इराक र साउदी अरब पु¥याउने गरेका छन् । कुवेतमै कार्यरत घरेलु महिला कामदारको अवस्था पनि नाजुक छ । कुवेतस्थित नेपाली दूतावासमा रहेको सेल्टरमा २ सय ५० भन्दा बढी महिला छन् । ती सबै घरेलु कामदारका रूपमा त्यहाँ छिरेका र मालिकको यातना सहन नसकी भागेर दूतावासको शरणमा पुगेका हुन् ।
