सवारी नियम उल्लङ्घन गर्नेको जानकारी दिनेलाई जिल्ला ट्राफिक प्रहरी कार्यालय गोरखाले एकसय रुपैयाँको रिचार्ज कार्ड दिने भएको छ । सवारी नियम उल्लङ्घन गरिएको पुष्टि हुने गरी ट्राफिक प्रहरीलाई जानकारी दिएमा तुरुन्तै रिचार्ज कार्ड प्रदान गर्ने ट्राफिक प्रहरी प्रमुख प्रवीण आचार्यले जानकारी दिए ।
यातायात व्यवसायी समिति गोरखासँगको समन्वयमा ट्राफिक प्रहरीले रिचार्ज कार्ड दिने भएको हो । ट्राफिक प्रहरीले व्यस्त चोकमा हेल्प डेस्क स्थापना गरेर रिचार्ज कार्ड अभियान सुरु भएको बताएको छ ।
गोरखाको हरमटारी चोक, क्षेत्र नम्बर २ प्रवेश गर्ने बाह्रकिलो बजार चोक, क्षेत्र नं ३ को घ्याम्पेसाल चोक, दोस्रो व्यापारिक केन्द्र आरुघाट बजार, क्षेत्र नं २ को पालुङटार, भच्चेक, छोप्राकको चोरकाटेलगायतका ठाउँमा पनि हेल्प डेस्क स्थापना गरेको ट्राफिक प्रहरीले जनाएको छ ।
सवारी चालकले ट्राफिक नियम उल्लङ्घन गरेको जो–कोहीले देखेमा प्रहरीको पैसा नलाग्ने टेलिफोन १०० मा तुरुन्तै सम्पर्क गरेर जानकारी दिन सर्वसाधारणलाई ट्राफिक प्रहरीले अनुरोध पनि गरेको छ ।
