काठमाडौं। जनकविकेशरी धर्मराज थापाको निधन भएको छ। थापा ९२ वर्षका थिए। लामो समयदेखि बिरामी थापाको स्वयम्भूस्थित निवासमा निधन भएको हो। उनको पार्थिव शरीरलाई अन्तिम श्रद्धाञ्जलिका लागि प्रज्ञा प्रतिष्ठानमा राखिने भएको छ। उनको जन्म १९८१ साल साउन १ गते कास्कीको बाटुलेचौरमा भएको थियो ।
उच्च रक्तचाप, मधुमेह, मस्तिष्क पक्षघात लगायतका रोगबाट ग्रसित थापालाई गत वर्ष पनि लामो समय वीर अस्पतालको आइसियुमा राखी उपचार गरिएको थियो।
उनको हरियो डाँडामाथि हलो जोत्ने साथी, आज मादल बजेको किन?, हाम्रो तेन्जिङ शेर्पाले जस्ता गीत निकै प्रसिद्ध छन्। उनको लेखन र गायन मौलिक र जनजिब्रोमा झुण्डिने प्रकृतिका थिए। विशेष गरी मौलिक लेखनमा गीतकार र कविका रूपमा चिनिने थापाको सङ्कलन र सम्पादनको क्षेत्रमा चाहिँ लोकभाका, लोकध्वनि र लोकसाहित्य हो। उनले थुप्रै पुरस्कार प्राप्त गरेका छन्।
उनकी छोरीहरु ज्ञानु राणा र यानु भट्ट गायिका हुन्। जेठो छोरा मदनराज थापा स्वास्थ्य क्षेत्रमा कार्यरत छन् भने माइला कुञ्जराज पोखराको पृथ्वीनारायण क्याम्पसमा सहप्राध्यापक छन्। कान्छा छोरा डा. बुलन्द थापा हुन्।
