सोमबार, जेठ १३ २०७६ | Mon, May 27, 2019
नेपालको समय: १३:०८ | UK Time: 08:23

अन्टार्टिकाको हिमाल आरोहणसँगै नेपाली महिला टोलीको कीर्तिमान

विनेपाली
२०७१ पुष ९ गते २२:०२

काठमाडौँ। पर्वतारोहणका क्षेत्रमा नेपाली महिला टोली विश्व कीर्तिमान स्थापना गर्न सफल भएको छ। विश्वका सातै वटा महादेशका सर्वोच्च हिमशिखर आरोहण गर्ने साहसिक अभियानमा रहेका नेपाली महिलाको समावेशी आरोहण टोलीले मङ्गलबार दिउँसो ३ बजे अन्टार्टिका महादेशको सर्वोच्च शिखर भिन्सन म्यासिफको चुचुरो चुमेर नयाँ विश्व कीर्तिमान स्थापना गरेको हो ।seven_Summit_Women1

टोलीकी संयोजक शैली बस्नेतका अनुसार, चार हजार ८९२ मिटर अग्लो सो शिखर चुम्ने आरोहीमा चुनु श्रेष्ठ, पेमाडिकी शेर्पा, माया गुरुङ र निम्डोमा शेर्पा छन् ।

महिला मात्र सम्मिलित टोलीले सातै महादेशका सर्बोच्च शिखरको सफलतापुर्वक आरोहण गरी विश्व कीर्तिमान कायम गरेको हो ।

विश्वको सर्बोच्च शिखर सगरमाथाको सफल आरोहणबाट सुरु भएको यस अभियानअन्तर्गत उक्त समावेशी टोलीले यसअघि अस्ट्रेलिया, युरोप, उत्तर अमेरिका, दक्षिण अमेरिका र अफ्रिकाका सबैभन्दा अग्ला हिमशिखरको सफल आरोहण गरेको थियो ।

उचाइ धेरै नभए पनि अति नै चिसो, जोखिम, दूरी र खर्चका दृष्टिले सात शिखरमध्ये सबैभन्दा चुनौतीपूर्ण आन्टार्टिका रहेको टोली संयोजक बस्नेतको भनाइ छ ।

आफ्नो टोलीको असाधारण अभियान सफल बनाउन सहयोग गर्ने नेपाल सरकार, पर्यटन बोर्ड, उद्योगी, व्यवसायी, विदेशस्थित नेपाली राजदूतावासलगायत सम्पूर्ण स्वदेशी, विदेशी सहयोगीप्रति समावेशी महिला पर्वतारोही दलले आभार व्यक्त गरेको छ ।seven_Summit_Women

हिमशिखर आरोहणका साथै महिला सशक्तिकरण, बालिका शिक्षा र पर्यावरण संरक्षणलाई पनि आफ्नो अभियानको उद्देश्य बनाएको सो सात सदस्यीय टोलीमा आशाकुमारी सिंह र पुजन आचार्य पनि छन् ।

 

प्रतिक्रिया

सम्बन्धित सामाग्री

फेसबुक