जयपुरा (इन्डोनेसिया), ३२ साउन । आइतबार हराएको इन्डोनेसियाको विमानमा साढे छ अर्ब इन्डोनेसियाली रुपैयाँ (करिब पाँच लाख अमेरिकी डलर) रहेको सूचना सार्वजनिक भएको छ ।
उक्त विमानमा कम्तीमा पनि साढे छ अर्ब इन्डोनेसियाली रुपैयाँ रहेको र उक्त रकम गरिब नागरिकका लागि राहत स्वरुप बाँड्न त्यहाँ पठाइएको सरकारी अधिकारीले सोमबार जनाएका छन् । इन्डोनेसियाको पूर्वी प्रान्तका गरिब नागरिकलाई राहातका रुपमा वितरण गर्नका लागि सो रकम पठाइएको जानकारी सरकारले आज दिएको हो ।
जयपुरा पोष्ट अफिसका एकजना अधिकारीले दिएको जानकारीअनुसार पूर्वी क्षेत्रका गरिबका लागि वितरण गर्न यो सरकारी रकम लिएर गएको र त्यसका लागि उक्त कार्यालयका चारजना सुरक्षाकर्मी पनि रहेको जनाएका हुन् ।
अधिरकारीहरुका अनुसार चालक दलका सदस्यसहित ५४ यात्रु लिएर जयपुराबाट अक्सिविलका लागि उडेको विमान खराब मौसमका कारण सम्पर्कविहीन भएको हो । आइतबार विमान खराब मौसमका कारण सम्पर्कविहीन भएको हुनसक्ने प्रारम्भिक अनुमान गरिए बमोजिम नै दुर्घटनाग्रस्त हुन पुगेको आंशिक अनुमान गरिएको छ ।
इन्डोनेसियाली त्रिगंगा हवाई बाहक कम्पनीद्वारा उडान भरिएको एटीआर ४२¬–३०० टर्बोप्रप विमान स्थानीय समयअनुसार दिउँसो ३ बजेदेखि हराएको इन्डोनेसियाली खोज तथा उद्धार संस्थाले पुष्टि गरेको छ ।
उद्वारकर्ताहरु दुर्घटना नजिक– अधिकारीहरु
दुर्घटनाग्रस्त भएको अनुमान गरिएको एक पहाडको नजिक उद्वारकर्ताहरु पुगेका बताइएको छ । उनीहरु दुर्घटनाको अनुमान गरिएको क्षेत्रको निकै नजिक पुगिसेकेको अधिकारीहरुले जनाएका छन् ।
पैतालिस मिनेटको यात्रापछि अवतरण गर्ने गरी उडेको उक्त जहाज अवतरण हुनुभन्दा १० मिनेट अगाडि सम्पर्क बाहिर गएको अक्सिविल हवाई ट्राफिक नियन्त्रण कार्यालयले जनाएको छ ।
विमानको खोजीका लागि त्रिगङ्गा विमान कम्पनीले सोही हवाई बाटो भएर अर्को एक विमान पठाएकोमा उसले उक्त विमानका भग्नावशेष भेटेको बताएको थियो । अक्सिविल इन्डोनेसियाको हिमाली एवम् अग्लो पहाडमा अवस्थित भू–भाग हो । सोही क्षेत्रमा नै विमान खसेको अनुमान गरिएको हो ।
अक्सिविल पहाडमा नै सो विमान दुर्घटनाग्रस्त भएको सो क्षेत्रका गाउँलेले यसअघि नै बताएका थिए । उनीहरुकै सूचनाका आधारमा हवाई अधिकारीहरुले खोजीका लागि अर्काे विमान सोमबार बिहान पठाएका छन् ।
उनीहरुका अनुसार यसअघि पनि आइतबार पठाइएको विमानले जहाजका भग्नावशेषहरु भेट्न नसकेको भए पनि सोही पहाडमा खसेको किटानी गरेको थियो । अधिकारीहरुले सोमबार गएका उद्वारकर्मीहरुको जहाज दुर्घटनाको नजिक पुग्न थालेको बताएका छन् ।
