संविधानमा हिन्दू शब्द नपर्दा आश्चर्य प्रकट

काठमाडौँ, २६ मङ्सिर । असी प्रतिशतभन्दा बढी हिन्दूको बाहुल्यता रहेको मुलुकको नयाँ संविधानमा एक ठाउँमा पनि हिन्दू शब्द नपरेको भनी आश्चर्य प्रकट गरिएको छ ।

आज यहाँ आयोजित साक्षात्कार कार्यक्रममा काठमाडाँै कमलाक्षी निवासी हीरेन्द्रबहादुर ताम्राकारले धर्मनिरपेक्षताको आडमा संविधानमा बहुसङ्ख्यक जनताले ग्रहण गरिआएको हिन्दू र बौद्ध धर्मसँगसम्बन्धित एउटा पनि शब्द उल्लेख नगरिएकोमा दुखेसो पोख्नुभयो ।

उहाँले भन्नुभयो– “तर अत्यन्तै सानो सङ्ख्यामा रहेका धार्मिक समुदायको नाममा आयोग गठन गर्नेमात्र नभई आठवटा धाराको १२ स्थानमा उनीहरुको समुदायको शब्द प्रयोग भएको छ, यसले विभेद भएको पुष्टि गरेको छ ।”

विसं २०७२ असोज ३ गते जारी भएको संविधानमा हिन्दूको भावनालाई समेट्न नसक्दा तराई मधेसको आन्दोलन, नाकाबन्दी र सवारी साधनसमेत सडकमा जोरबिजोर गरेर चलाउनुपर्ने अवस्था सिर्जना भएको अर्का वक्ता मातातीर्थका बालगोपाल खड्काले दाबी गर्नुभयो ।

धार्मिक विभेदकारी शब्दावली बदर गरी साविककै निरपेक्षता कायम गराउनका लागि उत्प्रेषणलगायतको आदेश र पुर्जी जारी गरीपाउँ भनी आफूलगायत पाँचजनाले सर्वोच्च अदालतमा रिटका लागि तयारी गरिसकेको उहाँहरुले जानकारी दिनुभयो ।

कुनै समुदाय र धर्म विशेषलाई विशेष प्रकारको बढावायुक्त व्यवस्था गरिनुले अरु धर्मलाई विभेद हुन जान्छ भन्दै उहाँहरुले धर्म निरपेक्षताको मूलमर्म विपरीत, गैरसंवैधानिक, विभेदकारी र अन्यायपूर्ण धारा आफँैमा बाझिएकाले प्रस्तावना र मौलिक हकअन्तर्गतका ती प्रावधानलाई बदर गराउन माग गरिने बताउनुभयो ।

संविधान जारी भएपछि दिगो शान्ति स्थापना भई मुलुक समृद्धिको बाटोमा जाने भनेर राजनीतिक दलका नेताहरुले दिएको अभिव्यक्तिलाई अहिलेको असहज परिस्थितिले उपहास गरेको पनि उहाँहरुले बताउनुभयो ।