तस्विरः थापाको फेसबुकबाट
लन्डन । बेलायतका पहिलो नेपाली सोलिसिटर राजु थापाले पछिल्लो पटक भूपू गोर्खाका वयस्क सन्तानहरु र बिधवाको मुद्दामा अत्यधिक सफलता प्राप्त गरेपछि नेपाली समुदायबाट प्रशंसै प्रशंसा पाएका छन् ।
भारतस्थित ब्रिटिश हाइ कमिसनले भिजा नदिएपनि थापाले अदालतबाट करिब दुई महिना अवधिमा २२ वटा मुद्दा (शतप्रतिशत) जितिसकेका छन् । यो जितपछि गोर्खा अभियन्ता, तिनका सन्तान र बेलायतका एनआरएन अगुवाबाट थापाको प्रशंसा भएको हो ।
एनआरएनए यूके उपाध्यक्ष योगकुमार फगामीले आफ्नो फेसबुक स्टाटसमा लेखेका छन्, ‘व्यवसाय भन्दा पनि समाजमा ठूलो सेवा पुर्याउन सफल समाजसेवी तथा पहिलो नेपाली सोलिसिटर श्री राजु थापा र एभरेस्ट ल सोलिसिटर फर्मप्रति केही नलेखि बस्न सकिन । सन्दर्भः भूपूहरु र उहांका परिवारहरु हुन् । म केहि शब्द दर्साउन बाध्य भए नगरुं पनि मनले दिएन । विषय केहि हप्ता पहिला भएको भए पनि मेरो व्यस्तताले यसअघि उतार्न सकिन । मेरो काकाको छोरा ३० वर्ष पुग्न लागेका बिमल फगामीको हतारमा निवेदन लगाएछन् तर नतिजा रिफ्यूज भएर आयो । एकदिन काका आउनु भो अनि भन्नुभयो, लौ न बर्बाद भो मलाई त सहयोग गर्नुस् । अब सहयोग गर्नै पर्ने भो । छुट्टी मिलाएर काकासंगै इलिंग अफिस गएर केश दर्ता गरियो । अफ्ठेरो छ तर हामी कोसिस गर्छौं भनेपछि केस मजबुत बनाउन दुइ पटक अफिस पुगियो इलिंगमा । त्यहांका स्टाफहरु र स्वयम् राजुजीसंग नजिक बसेर कुरा गर्ने मौका पनि मिल्यो भनौं साधारण परिचय देखि अझ नजिक हुने मौका मिल्यो । केस सफल हुनुमा मात्र होइन उहांहरुको व्यवहारमा थप गौरव गर्न मन लाग्यो ।
अहिलेसम्म सत प्रतिसत केस सफल भएको सुन्न पाउंदा अझ थप गौरवको महसुस गरें । धन्यबाद र हार्दिक बधाई राजुजी र एभरेस्ट ल सोलिसिटर फर्मका सम्पूर्ण टिमलाई । आफ्नो व्यवसाय भन्दा पनि कम्युनिटीमा यस्ता उदाहरणीय सेवाहरु उपलब्ध गराइदिनु भएको छ । यस्ता विचलित परिवारहरु विशेषत भूपू गोर्खा परिवारहरुलाई पुनर्मिलन गरिदिन सफल हुनु भएको छ । अझ थप सफलताको कामना गर्दछु र बेलायतवासी नेपाली दाजु भाइ तथा दिदी बहिनीहरुका पनि कानुनी समस्या छन् भने उहांहरुसंग सम्पर्क गर्नुहोला ।’
बेलायत सरकारले ३० वर्ष माथिका वयस्क आश्रित र विधवाका छोराछोरीलाई आफनो नीतिमा नराखेपनि मानवअधिकार र ऐतिहासिक अन्यायका आधारमा टेकेर मुद्दा जितिइएको सोलिसिटर थापा बताउंछन् । थापाले कानुनी दृष्टिकोणबाट विश्लेषण गर्दा गोर्खा आश्रितमाथि भएको अन्याय मुद्दाको जितले अन्त्य गरेको बताए ।
मुद्दा सफल हुन चाहिने आवश्यक कागजात प्रमाणहरु, फर्मको तयारी, बाबुआमाको बयान, पारिवारिक सम्वन्ध के कसरी बढिरहेको छ सो को तथ्य, मुद्दाका लागि तयार गर्दा चाहिने आवश्यक प्रमाण र वहस गर्दा अनुभवी ब्यारिष्टरको समिश्रणबाट मुद्दा जितिएको थापा बताउंछन् ।
