बिहीबार, मंसिर २८ २०७४ | Thu, December 14, 2017
नेपालको समय: ०२:१७ | UK Time: 20:32

भित्तामा झुण्डिएको अँग्रेजी क्यालेण्डर

विनेपाली
२०७३ पुष १७ गते ११:२५
कवि तथा पत्रकार योगी । फोटो सौजन्य: बिमल नेपाल

कवि तथा पत्रकार योगी । फोटो सौजन्य: बिमल नेपाल

समाचार उही, विचार उही

पेशा र संस्कार उही

खै केही पनि त बदलिएन नयाँ वर्षमा

फेरिएछ त फगत उही भित्तामा झुण्डिएको अँग्रेजी क्यालेण्डर ।

धुवाँ, धुलो, अस्तव्यस्त जिन्दगी

दौडीरहेछौं तर कहिं कतै नपुगिने

पद, शक्ति र पैसाको होडबाजीमा

आफ्नै अहंकारलाई प्रज्वलित गर्दै

कुदीरहेछौं केवल मृगतृष्णाका पछि

छाडेर जानुछ यी सबै एक दिन

परिवार, समाज, मुलुक र यो विश्व

त्यो दिन कहिले हो कसैलाई थाहा छैन

कसरी निस्कने हो यो भुमरीबाट त्यो पनि थाहा छैन

एउटा त्यान्द्रोमा अडिएको छ जीवन

चुँडिन सक्छ कुनै पनि बेला

तर बदलिन चाहँदैनौं हामी न भित्र न बाहिरबाट

आयो अर्को नयाँ वर्ष, तर फेरिएनौं हामी

फेरिएछ त फगत उही भित्तामा झुण्डिएको अँग्रेजी क्यालेण्डर ।

अविश्वास र आशंकाको ठाउँ लिनुपर्ने हो प्रेम र विश्वासले

घृणा र अहंकारलाई प्रतिस्थापित गर्नुपर्ने हो स्नेह र सद्भावले

दुई दिनको जिन्दगीमा सुख र शान्ति सिवाय मानिसले चाहेको नै के छ र?

तर त्यो शान्ति पाउने कहाँ?

खोज्यौं हामीले पसलमा, मठमन्दिर र चर्चहरुमा

भर्खरै थाहा भयो, त्यो असीम आनन्दको स्रोत त हामी भित्रै रहेछ

केवल एकपटक आफ्नै मनभित्र चिहाएर हेर्नुपर्ने रहेछ

जोडेर मनको तार अनन्तको झंकारसंग

एकाकार हुन प्रयत्न गर्नुपर्ने रहेछ

संसार बदल्न हिंडेका हामी,कहिल्यै तयार भएनौं आफैलाई बदल्न

आयो घुम्दै फिर्दै नयाँ वर्ष, तर फेरिएनौं हामी

फेरिएछ त फगत उही भित्तामा झुण्डिएको अँग्रेजी क्यालेण्डर।

१ जनवरी, २०१७

बर्न्टओक, लण्डन

प्रतिक्रिया

सम्बन्धित सामाग्री

फेसबुक