लन्डन । बेलायतमा रहेका नेपालीमुलका वकिलहरूको संगठन ब्रिटेन नेपाल लयर्स एसोसिएनमा नयां नेतृत्व चयन भएको छ ।
शनिबार सम्पन्न साधारणसभाले ब्यारिस्टर देवेन्द्र श्रेष्ठको नेतृत्वमा नयाँ कार्यसमिति चयन गरेको हो । नयाँ कार्यसमितिको महासचिवमा अमृत खरेल, प्रवक्ता गोविन्द बेल्वासे, कोषाध्यक्ष उमेश शाह छन् भने सदस्यहरूमा प्रकाश पोखरेल, उत्तरमान तिगेला, जुना पोते राणा, कोपिला सिटौला र सन्दीप पौडेल चुनिएका छन् ।
कार्यसमितिमा पूर्व अध्यक्ष पदेन सदस्य रहने र नवनिर्वाचित अध्यक्षले निकट भविष्यमा दुई सदस्य थप गर्ने प्रावधान छ ।
वेब्रीज अवस्थित दी ग्रेट गोर्खाज रेस्टुरेन्टको सभाकक्षमा सम्पन्न साधारणसभाले निवर्तमान अध्यक्ष सोलिसिटर राजु थापा नेतृत्वको कमिटीलाई संगठनको पहिलो सफल कार्यकालका लागि धन्वबाद ज्ञापन गरेको छ ।
कार्यक्रममा प्रमुख अतिथि कानुन तथा न्याय मन्त्रालयका पूर्व सचिव त्रिलोचन उप्रेतीले बेलायत र नेपालमा समेत कानुनको शासन र प्रजातन्त्र दिगो गर्न संस्थाले भूमिका निभाउने आशा व्यक्त गरे । संस्थाका संरक्षक प्रा. डा. सूर्य सुवेदीले नयाँ नेतृत्वले बेलायतमा रहेका कानुन पेशामा आवद्ध हुन चाहने नयाँ पुस्तालाई प्रोत्साहन तथा सहयोग गर्नुका साथै नेपाली समुदायमा सद्भाव र अमनचयनका लागि कानुनी सेवा उपलब्ध गराउन सकारात्मक भूमिका निभाउने अपेक्षासहित शुभकामना सहित नयाँ कार्यसमितिलाइ बधाई ज्ञापन गरे ।
