बोर्नमाउथ विश्वविद्यालय नेपाली पत्रकारको सीप अभिवृद्धिका लागि तयार

लन्डन । बोर्नमाउथ विश्वविद्यालयले नेपाली पत्रकारको सीप अभिवृद्धिका लागि सहयोग गर्ने बताएको छ । विश्वविद्यालय भ्रमणमा गएको नेपाल पत्रकार महासंघ यूके शाखाको प्रतिनिधि मण्डलसित विश्वविद्यालयका अधिकारीहरुले सो आश्वासन दिएका हुन् ।

विश्वविद्यालयका एसोसिएट डिन प्रोफेसर गाइ स्टाकीले नेपाली पत्रकारहरुसंग सहकार्य गर्न आफूहरू तयार रहेको र सहकार्य गरिने क्षेत्रका बारेमा प्रस्ताव ल्याउन आग्रह गरे ।

विश्वविद्यालयका सहकार्य तथा अन्तर्राष्ट्रिय विकास म्यानेजर डा. अलिस्टर मोरिसनले बोर्नमाउथ विश्वविद्यालयमा विद्यार्थीलाई अध्यापन मात्र होइन बजारमा जान योग्यसमेत बनाइने उल्लेख गर्दै नेपालमा पनि विश्वविद्यालयका योजना लान इच्छुक रहेको बताए ।

विश्वविद्यालयका मिडिया स्कुलका एसोसिएट प्रोफेसर डा इनोर थोर्सनले यूकेका नेपाली पत्रकारहरूलाई समूहगत र व्यक्तिगतरूपमा लामो तथा छोटो कोर्स उपलब्ध गराउन विश्वविद्यालय तयार रहेको बताए ।

नेपाल पत्रकार महासंघ यूके शाखाका अध्यक्ष नरेश खपांगीमगरले यूके तथा नेपालमा कार्यरत नेपाली पत्रकारहरूलाई पत्रकारिताको तालिम, उच्च शिक्षा अध्ययन र अनुसन्धान लगायतका क्षेत्रमा सहकार्य गर्न अनुरोध गरेका थिए ।

उक्त अवसरमा डा थोर्सनले भूकम्पपछि नेपालमा गरिएको ‘नेपाल आफटरसक’ अध्ययन तथा सिनियर लेक्चरर जेमी म्याथ्युले क्राइसिस रिपोर्टिङका बारेमा प्रस्तुति दिएका थिए ।

अध्यक्ष नरेश खपाङ्गीमगरको नेतृत्वमा विश्वविद्यालय भ्रमणमा गएको पत्रकार टोलीमा सल्लाहकार नवीन पोखरेल, वरिष्ठ उपाध्यक्ष श्याम लुइंटेल, उपाध्यक्ष ध्रुवराज अर्याल, महासचिव लीलामान शेरपुन्जा, कोषाध्यक्ष पूर्ण गुरुङ तथा पत्रकारहरू मधुकर गुरुङ, सिद्धार्थ विक्रम क्षेत्री, बीरेन्द्र श्रेष्ठ र यूके नेपाल मैत्री समाजका अध्यक्ष अलान मार्शल स्याङका थिए ।

प्रतिक्रिया

सम्बन्धित सामाग्री