आइतबार, जेठ १४ २०७४ | Sun, May 28, 2017
नेपालको समय: ०१:०३ | UK Time: 20:18

प्रधानमन्त्रीको भ्रमण विश्वास बढाउने अवसर – परराष्ट्रविद्

रासस
प्रकाशित मिति:२०७३ चैत ६ गते १९:१०

काठमाडौँ, ६ चैत । परराष्ट्र मामिलाका जानकारहरुले प्रधानमन्त्री पुष्पकमल दाहाल ‘प्रचण्ड’को आसन्न चीन भ्रमणलाई दुवै देशबीचको आपसी सम्बन्धलाई थप प्रगाढ बनाउने अवसरका रुपमा लिनुपर्ने बताउनुभएको छ ।

रिपोर्टर्स क्लब नेपालले यहाँ आज आयोजना गरेको साक्षात्कार कार्यक्रममा चीनका लागि नेपालका पूर्वराजदूत राजेश्वर आचार्यले भ्रमणलाई विगतमा चीनसँग नेपालले गरेको सन्धि सम्झौता कार्यान्वयनमा उपयोग गर्नुपर्ने बताउनुभयो ।

पछिल्ला दशकमा चीनको अन्तर्राष्ट्रियस्तरमा बढ्दो शक्ति र उपस्थितिले चीनसँगको कूटनीतिक आयाम परिवर्तन भएको बताउँदै उहाँले नेपालले पनि सोहीअनुसार नै बुझ्नुपर्नेमा जोड दिनुभयो ।

सन् १९९६ पछि कुनै पनि चिनियाँ राष्ट्रपतिको नेपाल भ्रमण हुन नसकेको प्रसङ्ग उल्लेख गर्दै पूर्वराजदूत आचार्यले त्यसका लागि नेपालमा उपयुक्त वातावरण बनाउनुपर्ने बताउनुभयो ।

कार्यक्रममा रुसका लागि नेपालका पूर्वराजदूत हिरण्यलाल श्रेष्ठले प्रधानमन्त्री दाहालको चीन भ्रमण वर्तमान सरकार गठनका बेला भएको आलोचना सच्याउने अवसरका रुपमा हुने जिकिर गर्नुभयो ।

भ्रमणका दौरानमा ‘वान बेल्ट वान रोड’ सम्झौतामा हस्ताक्षर हुने अपेक्षा गर्दै उहाँले उक्त सम्झौताले नेपालमा चीनबाट रेल र तेल (पेट्रोलियम पदार्थ) ल्याउन सहज हुने बताउनुभयो । दुवै देशको कूटनीतिक वार्तामार्फत उत्तरी नाकाको विकास र विस्तार गरी नेपालको उत्तरी क्षेत्रमा कायम रहेको आर्थिक विपन्नता हटाउनुपर्ने उहाँको धारणा थियो ।

कार्यक्रममा सांसद एवम् नेपाल–भारत प्रबुद्ध समूहका सदस्य डा राजन भट्टराईले भ्रमणको पूर्वसन्ध्यामा पनि प्रधानमन्त्रीको भ्रमणका बारेमा स्पष्ट हुन नसक्नुमा आश्चर्य व्यक्त गर्नुभयो ।

विगतको सरकारले चीनसँग गरेका पारवहन र यातायात सम्झौता कार्यान्वयन गर्न सरकार अग्रसर हुनुपर्ने बताउँदै सांसद भट्टराईले प्रधानमन्त्रीको आसन्न भ्रमणलाई चीनसँग विश्वासको वातावरण बढाउने मौकाका रुपमा लिनुपर्नेमा जोड दिनुभयो ।

प्रधानमन्त्री दाहालले यही चैत १० गतेदेखि चीनको भ्रमण गर्नुहुने तयारी भइरहेको छ ।

तपाईको प्रतिक्रिया




फेसबुक