एसीसी इमर्जिङ कपमा नेपालद्वारा हङकङ पराजित

काठमाडौँ, १७ चैत । बङ्गलादेशमा जारी एसीसी इमर्जिङ टिम्स क्रिकेट प्रतियोगिताअन्तर्गत समूह चरणको अन्तिम खेलमा नेपालले हङकङलाई सात विकेटले पराजित गरेको छ ।

हङकङले दिएको २१५ रनको लक्ष्य नेपालले ४२ दशमलव २ ओभरमा तीन विकेट गुमाउँदै पुरा गरयो । दीपेन्द्रसिंह ऐरीले छक्का प्रहार गर्दै नेपाललाई प्रतियोगितामा सान्त्वना जित दिलाएका हुन् ।

बङ्गलादेशको कक्स बजार स्टेडियममा नेपालले टस जितेपछि हङकङलाई ब्याटिङको निम्तो दिएको थियो । हङकङले निर्धारित ५० ओभरमा सबै विकेट गुमाएर २१४ रन बनायो । कप्तान ज्ञानेन्द्र मल्लले जितको आधार तयार पारेपछि नेपाललाई जित्न सहज भएको हो । दीपेन्द्रसिंह ऐरी र शरद भेषवाकरबीच एक सय पाँच रनको साझेदारी भएपछि नेपालले दुई सय २० रन बनायो ।

कप्तान मल्लले सर्वाधिक ७० रनको योगदान दिए । उनले ८२ बल खेल्ने क्रममा ११ चौका प्रहर गरे । खेलको २७औँ ओभरको एक बल बाँकी छँदा मल्ल बाहिरिएपछि मैदान प्रवेश गरेका अशिफ शेख र दिलिप नाथपनि सस्तैमा आउट भएपछि ऐरी र भेषवाकरले पारी सम्हालेका थिए । दीपेन्द्रले ८३ बल खेल्दै ६० रन जोडे । यसमा एक छक्का र पाँच चौका सामेल थियो । यस्तै ५१ बल खेलेका भेषवाकरले तीन छक्का र तीन चौकाको मद्दतमा ५५ रनको योगदान दिए । नाथले १२ तथा शेखले ८ रन जोडे । बलिङतर्फ हङकङका झाटवेध सुब्रमन्यमले दुई र निजाकट खानले एक विकेट लिए ।

यसअघि ब्याटिङ गर्ने क्रममा हङकङका लागि प्रारम्भिक ब्याट्सम्यान क्यामरन म्याकअलसन र अंशुमान राथले ९५ रनको साझेदारी गरेका थिए । अंशुमानले सर्वाधिक ५१ रनको योगदान दिए । उनले ६४ बलमा सात चौका प्रहार गरे । यस्तै क्यामरनले ६९ बलमा पाँच चौकाको मद्दतमा ४३ रन बनाए । वाकस खानले ३०, साहिद वासिफले २२, इशान खानले १८ र वजिद शाहले १६ रन बनाए ।

बलिङतर्फ नेपालका लागि अभिनाश कर्णले सर्वाधिक तीन विकेट लिए । उनले पाँच ओभर बलिङ गर्दै २९ रन खर्चे । यस्तै कप्तान ज्ञानेन्द्र मल्ल, भुवन कार्की र सुशन भारीले समान दुई–दुई विकेट लिए । मल्लले सात ओभरमा २५ रन दिए । कार्कीले १० ओभर बलिङ गर्दै एक मेडन राखेर ३७ रन खर्चे । यस्तै भारीले १० ओभर बलिङ गर्दै ५३ रन दिए भने सन्दिप लामिछाने एक विकेट लिए ।

नेपाल र हङकङ समान दुई–दुई खेल हारेर प्रतियोगिताको समूह चरणबाटै बाहिरिएका छन् । नेपालले पहिलो खेल पाकिस्तानसँग ६ विकेटले तथा दोस्रो खेल बङ्गलादेशसँग ८३ रनको हारेको थियो । यस्तै हङकङ पहिलो खेलमा बङ्गलादेशसँग ८ विकेट तथा दोस्रो खेलमा पाकिस्तानसँग दुई सय ४८ रनले पराजित भएको थियो ।

एसियाली क्रिकेट परिषद् ( एसिसी) को आयोजनामा भइरहेको उक्त प्रतियोगितामा चार एसोसिएट राष्ट्र नेपालसँगै मलेसिया, अफगानिस्तान र हङकङ तथा टेष्ट मान्यताप्राप्त राष्ट्र बंगलादेश, पाकिस्तान, श्रीलंकाका र भारतका तेइस वर्षमुनिका खेलाडीको सहभागिता छ ।

प्रतिक्रिया

सम्बन्धित सामाग्री