शुक्रबार, जेठ १२ २०७४ | Fri, May 26, 2017
नेपालको समय: ०७:५२ | UK Time: 03:07

म्याक्रोँद्वारा फ्रान्सको राष्ट्रपतिका रुपमा पदभार ग्रहण

रासस-एएफपी 
प्रकाशित मिति:२०७४ जेठ १ गते १:१८

पूर्व राष्ट्रपति अलान्द नवनिर्वाचित राष्ट्रपतिलाई स्वागत गर्दै । तस्विरः एपी

पेरिस (फ्रान्स), ३१ वैशाख । फ्रान्सको इतिहासमा सबैभन्दा कम उमेरमा राष्ट्रपतिमा हालै निर्वाचित हुनुभएका इमानुएल म्याक्रोँले आइतबार पद तथा गोपनियताको सपथग्रहण गर्नुभएको छ ।

मध्यमार्गी नेता म्याक्रोँले गत आइतबार भएको निर्वाचनमा दक्षिणपन्थी नेता मरिन ले पेनलाई दोस्रो चरणको निर्वाचनमा पराजित गरी राष्ट्रपतिमा निर्वाचित हुनुभएको थियो ।

निर्वाचन परिणाम आएको ठिक एक हप्तापछि म्याक्रोँले फ्रान्सको राष्ट्रपतिका रुपमा कार्यभार सम्हाल्नुभएको हो ।

फ्रान्सको एलिसी प्यालेसमा पूर्व राष्ट्रपति अलान्दले नवनिर्वाचित राष्ट्रपतिलाई स्वागतपछि केही समय गोप्य वार्ता गर्नुभएको थियो । त्यसपछि म्याक्रोँलाई फ्रान्सको आणविक भण्डार सञ्चालन गर्ने आचारसंहिता सहितको पदभार औपचारिक रूपमा हस्तान्तरण गर्नुभएको थियो ।

म्याक्रोँलाई पूर्वराष्ट्रपति अलान्दले राजनीतिक यात्राको सुरुवात आफ्नै आर्थिक सल्लाहकारका रुपमा नियुक्त गरी सुरु गराउनुभएको थियो । उहाँलाई पछि अर्थमन्त्री बनाउनसमेत अलान्दको मुख्य भूमिका थियो ।

पदभार ग्रहण गर्नुपूर्व कन्तिच्युसनल काउन्सिलका लरेन्ट फेबिअसले निर्वाचनको परिणाम औपचारिक रुपमा घोषणा गर्नुभएको थियो । म्याक्रोँ युरोपियन युनियन आवद्ध सदस्य राष्ट्रसँग आफ्नो मध्यमार्गी नीतिका कारण लोकप्रिय मानिनु हुन्छ ।

सपथपछि उहाँले दिनुभएको छोटो मन्तव्यमा विश्व र युरोपले फ्रान्सलाई पहिलेभन्दा बढी मजबुत र भाग्यशाली भएको देख्न चाहेको बताउनुभयो । सपथग्रहणको औपचारिक कार्यक्रमपछि उहाँलाई २१ तोपको सलामी दिई स्वागत गरिएको थियो ।

तपाईको प्रतिक्रिया




फेसबुक