विभिन्न जिल्लाबाट मत परिणाम आउने क्रम जारी (पछिल्लो अपडेट)
नवलपरासीको मध्यविन्दु नगरपालिकाको प्रमुखमा काँग्रेसका चन्द्रबहादुर राना विजयी भएपछि विजयी उत्सवमा सहभागी नेपाली काँग्रेसका नेता तथा कार्यकर्ता । तस्बिर ः पुरुषोत्तम सुबेदी, नवलपरासी, रासस
शुक्लागण्डकीमा काँग्रेस र भिमाद नपा र घिरिङ गापामा एमाले विजयी
दमौली, ४ जेठ । शुक्लागण्डकी नगरपालिकाको प्रमुखमा नेपाली काँग्रेसका किसान गुरुङ तथा भिमाद नगरपालिकाको प्रमुखमा नेकपा (एमाले)का मेखबहादुर थापा विजयी भएका छन् ।
किसान गुरुङ नौ हजार चार सय २४ मत प्राप्त गरी विजयी हुनुभएको हो भने उहाँका निकटतम प्रतिद्वन्द्वी एमालेका रामचन्द्र उपाध्यायले आठ हजार सात सय ५ मत प्राप्त गर्नुभएको थियो ।
त्यस्तै उपप्रमुखमा एमालेकी सविता रसाइलीले आठ हजार नौ सय ८३ मत ल्याएर विजयी हुनुभयो भने उहाँका निकटतम प्रतिद्वन्द्वी नेकपा (माओवादी केन्द्र)की सर्वदा खनालले सात हजार चार सय ३६ मत प्राप्त गरेका थिइन् ।
शुक्लागण्डकीका १२ वडामध्ये ७ वटामा एमाले, ३ वटामा काँग्रेस र २ वडामा माओवादी केन्द्र विजयी भएको जिल्ला निर्वाचन कार्यालयले जनाएको छ ।
त्यस्तै मेखबहादुर थापाले छ हजार चार सय ६४ मत प्राप्त गरी भिमाद नगरपालिकाको प्रमुखमा विजयी हुनुभएको हो । उहाँका निकटतम प्रतिद्वन्द्वी काँग्रेसका पुष्प पराजुलीले छ हजार ८० मत प्राप्त गर्नुभएको थियो ।
उपप्रमुखमा एमालेकै शारदा खनालले छ हजार सात सय १२ मत प्राप्त गरी विजयी हुनुभएको छ भने उहाँका निकटम प्रतिद्वन्द्वी काँग्रेसका इन्दिरा खनालले पाँच हजार सात सय ७७ मत प्राप्त गर्नुभएको थियो ।
त्यस्तै घिरिङ गाउँपालिकाको अध्यक्षमा एमालेका रनबहादुर रानाले तीन हजार ७३० मत प्राप्त गरी विजयी हुनुभएको छ । उहाँका निकटतम प्रतिद्वन्द्वी काँग्रेसका विष्णुवीर थापाले दुई हजार आठ सय १९ मत प्राप्त गर्नुभएको थियो । उपाध्यक्षमा एमालेकै सरस्वती घिमिरे तीन हजार सात सय १३ मत प्राप्त गरी विजयी हुनुभयो भने उहाँका निकटतम प्रतिद्वन्द्वी काँग्रेसका निर्जला अर्यालले दुई हजार सात सय ६२ मत प्राप्त गर्नुभएको थियो ।
तनहुँका दस वटा स्थानीय तहमध्ये नौ वटा तहको मतपरिणाम सार्वजनिक भइसकेको छ । भानु नगरपालिकाको मतगणना कार्य अन्तिम चरणमा पुगेको निर्वाचन अधिकृत शिवप्रसाद लम्सालले बताउनुभयो ।
कमलामाईमा एमाले विजयी
सिन्धुली, ४ जेठ । कमलामाई नगरपालिकाको प्रमुख र उपप्रमुखमा क्रमशः नेकपा (एमाले)का खड्गबहादुर खत्री तथा मञ्जु देवकोटाले विजयी भएका छन् ।
एघार हजार एक सय ५२ मत ल्याई खत्री प्रमुखमा र नौ हजार नौ सय २१ मत ल्याई देवकोटा उपप्रमुख पदमा विजयी भएका हुन् ।
खत्रीका निकटतम प्रतिद्वन्द्वी नेपाली काँग्रेसका उपेन्द्र पोख्रेलले आठ हजार तीन सय ८८ र देवकोटाको निकटतम प्रतिद्वन्द्वी काँग्रेसकै सुशीला थिङले नौ हजार पाँच सय २३ मत प्राप्त गर्नु भएको थियो ।
पोखरा लेखनाथ महानगरपालिका ९ मा काँग्रेस विजयी
पोखरा, ४ जेठ । पोखरा लेखनाथ महानगरपालिका वडा नं ९ मा नेपाली काँग्रेसका समूह विजयी भएको छ ।
वडा अध्यक्षमा काँग्रेसका रामराज लामिछानेले एक हजार १७४ मत ल्याई विजयी हुनुभएको हो । उहाँका निकटतम प्रतिद्वन्दी नेकपा (एमाले)का गोविन्द तुलाचनले नौ सय ८२ मत प्राप्त गर्नुभएको थियो ।
त्यस्तै वडा सदस्यहरूमा काँग्रेसका राममाया मानन्धर, गीता नेपाली, सुरेश खवास र नन्दराम गिरी विजयी हुनुभएको जनाएको छ ।
पालुङटार नगरपालिकामा काँग्रेस विजयी
पालुङटार (गोरखा), ४ जेठ । पालुङटार नगरपालिकाका प्रमुखमा नेपाली काँग्रेसका दीपकबाबु कडेँल विजयी हुनुभएको छ ।
कडेँलले चार हजार छ सय ९८ मत प्राप्त गरी विजयी हुनुभएको हो । उहाँको निकटतम प्रतिद्वन्द्वी नेकपा (माओवादी केन्द्र)का विवश चिन्तनले चार हजार चार सय ९१ मत प्राप्त गर्नुभएको निर्वाचन अधिकृतको कार्यालयले जनाएको छ ।
चार हजार चार सय ९४ मत प्राप्त गरी माओवादी केन्द्रकी पम्फा बसेल उपप्रमुखमा विजयी हुनुभएको छ । उहाँको निकटतम प्रतिद्वन्द्वी काँग्रेसकी चेतकुमारी श्रेष्ठले चार हजार एक सय ९६ मत प्राप्त गनुभएको थियो । प्रमुख पदमा विजयी कडेँल पेसाले सिभिल इञ्जिनियर हुनुहुन्छ ।
नयाँ शक्ति पार्टी तेस्रो स्थानमा छन् । सो पार्टीले वडा नं १, ४ र ५ मा विजयी हासिल गरेको छ ।
यस्तै माओवादी केन्द्रले पालुङटार वडा नं २, ६, ८ र १० मा, काँग्रेसले वडा नं ३ र ९ मा तथा नेकपा (एमाले)ले वडा नं ७ मा विजय हासिल गरेको छ । प्रमुखमा विजयी भएपछि पत्रकारसँगको सङ्क्षिप्त कुराकानीमा कडेँलले पालुङटार नगरपालिकालाई समृद्ध बनाउन आफू लागिपर्ने बताउनुभयो ।
टोखामा एमाले विजयी
काठमाडौँ, ४ जेठ । टोखा नगरपालिकामा नेकपा(एमाले) विजयी भएको छ । नगरपालिका प्रमुखमा एमालेका प्रकाश अधिकारी र उपप्रमुखमा एमालेकै ज्ञानमाया डङ्गोल विजयी हुनुभएको निर्वाचन अधिकृत दीनबन्धु बरालले राससलाई जानकारी दिनुभयो । उहाँका अनुसार मत गणना सकिए पनि अन्तिम घोषणा गर्न केही समय लाग्नेछ ।
बनेपा १४ मा एमाले र पनौती ९ मा काँग्रेस विजयी
काभ्रे, ४ जेठ । बनेपा नगरपालिका वडा नं १४ को वडाध्यक्षमा नेकपा (एमाले)का गौरी रावत ६२५ मत ल्याई विजयी हुनुभएको छ । उहाँका निकटतम प्रतिद्वन्द्वी नेपाली काँग्रेसका टुल्कु लामाले ६१७ मत प्राप्त गर्नुभएको थियो ।
यस्तै पनौती नगरपालिका वडा नं ९ मा काँग्रेसको प्यानल विजयी भएको छ । वडाध्यक्षमा काँग्रेसका सहकुलकुमार हुमागाईं एक हजार एक सय ८१ मत प्राप्त गरी विजयी हुनुभयो भने उहाँका निकटतम प्रतिद्वन्द्वी एमालेका उद्धव थापाले चार सय ४६ मत प्राप्त गर्नुभएको थियो ।
वालिङ नगरपालिकामा काँग्रेस विजयी
वालिङ, ४ जेठ । वालिङ नगरपालिकाको प्रमुख र उपप्रमुखमा नेपाली काँग्रेस विजयी भएको छ । दस हजार छ सय मतसहित काँग्रेसका दिलीपप्रताप खाँण प्रमुख पदमा विजयी हुनुभएको छ भने उहाँका निकटतम प्रतिद्वन्द्वी नेकपा (एमाले) का पुण्यप्रसाद अर्यालले आठ हजार सात सय ४९ मत प्राप्त गर्नुभएको थियो ।
त्यस्तै उपप्रमुखमा काँग्रेसकी कल्पना तिवारी नौ हजार ८९५ मत ल्याएर विजय हुनुभएको छ भने उहाँकी निकटतम प्रतिद्वन्द्वी एमालेकी खगीसरा थापाले नौ हजार ३५७ मत प्राप्त गर्नुभएको थियो ।
कुल १४ वटा वडा रहेको वालिङ नगरपालिकामा काँग्रेसले प्रमुख र उपप्रमुखसहित सात वटा वडामा विजयी भएको छ भने एमाले पनि सात वडामा विजयी भएको छ ।
कुश्मा नगरपालिकामा काँग्रेस विजयी
फलेवास (पर्वत), ४ जेठ । कुश्मा नगरपालिका प्रमुखमा नेपाली काँग्रेसका रामचन्द्र जोशी विजयी हुनुभएको छ ।
जोशीका पक्षमा आठ हजार ५७ मत प्राप्त भएको छ । उहाँका निकटतम प्रतिद्वन्द्वी नेकपा(एमाले)का मेघनाथ सुवेदीका पक्षमा सात हजार २३९ मत गएको छ । त्यस्तै उपप्रमुखमा काँग्रेसकै सीता काफ्ले लामिछाने विजयी हुनुभएको छ । लामिछानेले आठ हजार ४१९ मत ल्याउँदा एमाले उम्मेदवार मुवाकुमारी शर्माले सात हजार २१ मत प्राप्त गर्नुभएको छ ।
बूढानीलकण्ठ ११, १२ र १३ मा एमाले विजयी
काठमाडौँ, ४ जेठ । बूढानीलकण्ठ नगरपालिका वडा नं ११, १२ र १३ मा नेकपा (एमाले) को प्यानल विजयी भएको छ ।
वडा नं ११ का अध्यक्षमा राजु अधिकारीले एक हजार दुई सय ७५ मत प्राप्त गरी विजयी हुनुभएको छ । उहाँका निकटत्म प्रतिद्वन्द्वी नेपाली काँग्रेसका अच्चूतप्रसाद पौडेलले एक हजार ५५ मत प्राप्त गर्नुभएको थियो ।
यसैगरी सदस्यहरुमा भगवती निरौला, रत्ना नगर्जी, विनोदकुमार तामाङ र विमल लामा विजयी भएका छन् । वडा नं १२ मा शम्भुप्रसाद भट्टराईले एक हजार ३८४ मत प्राप्त गरी अध्यक्ष पदमा विजयी हुनुभएको छ । उहाँका निकटत्म प्रतिद्वन्द्वी नेपाली काँग्रेसका होमनाथ तिमल्सिनाले एक हजार २७ मत प्राप्त गर्नुभएको थियो । ती वडाका सदस्यहरु शान्ता ढकाल पुडासैनी, मीना बयलकोटी, पुरुषोत्तम नेपाल, दिल्लीप्रसाद खतिवडा विजयी भएका छन् ।
वडा नं १३ को अध्यक्षमा श्रीकृष्ण श्रेष्ठले एक हजार ९५ मत प्राप्त गरी विजयी हुनुभएको छ । उहाँका निकटत्म प्रतिद्वन्द्वी नेपाली काँग्रेसका महेन्द्र श्रेष्ठले सात सय ५५ मत प्राप्त गर्नुभएको थियो । वडा सदस्यहरुमा रिना श्रेष्ठ, राममाया विक, श्याम श्रेष्ठ र मङ्गल नगरकोटी विजयी हुनुभएको छ ।
पछिल्लो मतगणना अनुसार, बूढानीलकण्ठ नगरपालिकाका प्रमुखमा एमालेकै उद्धवप्रसाद खरेलले चार हजार एक सय ४३ मत ल्याई अग्रस्थानमा हुनुहुन्छ भने उहाँका निकटत्म प्रतिद्वन्द्वी काँग्रेसका राजु श्रेष्ठले दुई हजार ९७० मत प्राप्त गर्नुभएको छ । त्यस्तै नेकपा (माओवादी केन्द्र) का रवीन अधिकारीले एक हजार तीन सय ४ र राप्रपाका सानुकान्छा श्रेष्ठले नौ सय ५५ मत प्राप्त गर्नुभएको नगर निर्वाचन अधिकृत सुरेश नेपालले जानकारी दिनुभयो ।
उपप्रमुखमा अहिलेसम्म एमालेकी रमादेवी राईले चार हजार ४५९, काँग्रेसकी सुभद्रा खड्काले तीन हजार ६४, माओवादीकी हेमा अधिकारीले एक हजार २४० मत प्राप्त गरेका छन् ।
निर्वाचन कार्यालयका प्राविधिक राजकुमार भण्डारीका अनुसार कुल ४० हजार २१० मतदाता रहेको सो नगरपालिकामा ३० हजार ५६९ मत खोसेको थियो ।
बेनीघाट रोराङमा माओवादी केन्द्र र त्रिपुरासुन्दरीमा एमाले विजयी
मलेखु (धादिङ), ४ जेठ । बेनिघाट रोराङ गाउँपालिकामा नेकपा (माओवादी केन्द्र) का हरि डल्लाकोटी छ हजार ४१ मत प्राप्त गरी विजयी हुनुभएको छ । उहाँका निकटतम प्रतिद्वन्द्वी नेकपा (एमाले)का गिरिराज कँडेलले पाँच हजार २५५ मत प्राप्त गर्नुभएको छ । गाउँपालिका उपाध्यक्षमा नेपाली काँग्रेसका देवीप्रसाद सिलवालले पाँच हजार ३०२ मत ल्याई विजयी हुनुभएको छ । उहाँका निकटतम प्रतिद्वन्द्वी एमालेका मायादेवी शर्माले पाँच हजार २७७ मत ल्याउनुभएको छ ।
यसैगरी उत्तरी धादिङको त्रिपुरासुन्दरी गाउँपालिकामा एमालेका शम्भुकुमार थापा चार हजार ७० मत प्राप्त गरी विजयी हुनुभएको छ । उहाँका निकटतम प्रतिद्वन्द्वी काँग्रेसका वासु तिमल्सिनाले तीन हजार ९६१ मत प्राप्त गर्नुभएको छ ।
गाउँपालिका उपाध्यक्षमा काँग्रेसका देवीकुमारी पाण्डे बुर्लाकोटी तीन हजार ९९० मत प्राप्त गरी विजयी हुनुभएको छ । उहाँका निकटतम प्रतिद्वन्द्वी एमालेका कृष्णमाया थापाले तीन हजार ८९६ मत प्राप्त गर्नुभएको छ ।
थाहा नगरपालिकामा माओवादी केन्द्र विजयी
हेटौँडा, ४ जेठ । मकवानपुरको थाहा नगरपालिका प्रमुखमा नेकपा (माओवादी केन्द्र)का लवशेर विष्ट नौ हजार ९१ मत ल्याई विजयी हुनुभएको छ । उहाँका निकटतम प्रतिद्वन्द्वी नेकपा (एमाले) का विष्णु ढकालले छ हजार ४९ मत प्राप्त गर्नुभएको छ । त्यसैगरी उपप्रमुखमा नेपाली काँग्रेसका खड्ग गोपाली सात हजार २६२ मत ल्याई विजयी हुनुभएको छ । उहाँका निकटतम प्रतिद्वन्द्वी एमालेकी कल्पना बलामीले छ हजार ५४५ मत ल्याउनुभएको जिल्ला निर्वाचन कार्यालयले जनाएको छ ।
भुम्लु गाउँपालिकामा एमाले विजयी
धुलिखेल, ४ जेठ । काभ्रेपलाञ्चोकको भुम्लु गाउँपालिकामा नेकपा (एमाले) विजयी भएको छ । सो गाउँपालिकाका अध्यक्ष र उपाध्यक्ष दुवैमा एमालेले विजयी हासिल गरेको हो । कोसीपारिस्थित सो गाउँपालिकामा एमालेबाट अध्यक्षमा गुमानध्वज कुँवरले तीन हजार पाँच सय ४८ मत ल्याएर विजयी हुनुभयो । उहाँका निकटतम प्रतिद्वन्द्वी नेपाली काँग्रेसका तस्बिर लामाले दुई हजार नौ सय ४९ मत प्राप्त गर्नुभयो । त्यस्तै उपाध्यक्षमा एमालेकै कल्पना श्रेष्ठले तीन हजार पाँच सय ३६ मत ल्याएर विजयी हुनुभयो भने निकटतम प्रतिद्वन्द्वी काँग्रेसकी शान्ता क्षेत्री थापाले दुई हजार आठ सय ३० मत प्राप्त गर्नुभयो ।
यस्तै भूम्लु – १ बाट नेकपा (माओवादी केन्द्र)का खिरबहादुर श्रेष्ठ, वडा नं २ बाट एमालेका कृष्णकुमार, वडा नं ३ बाट स्वतन्त्र ज्ञानबहादुर तामाङ, वडा नं ४ बाट एमालेका लोकबहादुर कुँवर, वडा नं ५ बाट काँग्रेसका अञ्चलकुमार लामा, वडा नं ६ बाट एमालेका भरतबहादुर शिवभक्ति, वडा नं ७ बाट एमालेका रमेशराज खरेल, वडा नं ८ बाट एमालेकै मोतीलाल तामाङ, वडा नं ९ बाट काँग्रेसका दलबहादुर तामाङ र वडा नं १० बाट काँग्रेसकै चित्रबहादुर लामा विजयी हुनुभएको छ ।
व्यासमा काँग्रेस विजयी
दमौली, ४ जेठ । तनहुँको जेठो नगरपालिका व्यास नगरपालिकामा प्रमुख, उपप्रमुखसहित १३ वटा वडामा काँग्रेसको पूरै समूह विजयी भएको छ ।
नगरपालिका प्रमुखमा १३ हजार ५६ मत प्राप्त गरी बैकुण्ठ न्यौपाने विजयी हुनुभएको छ । उहाँका निकटतम प्रतिद्वन्द्वी नेकपा (एमाले)का शङ्करनारायण श्रेष्ठले नौ हजार ५९२ मत पाउनुभएको छ । उपप्रमुखमा काँग्रेसकै मीरा जोशी १३ हजार २६० मत प्राप्त गरी विजयी हुनुभएको छ । उहाँका निकटतम प्रतिद्वन्द्वी नेकपा(माओवादी केन्द्र्र)का अतिन्द्रकेशरी न्यौपानेले तीन हजार ४७७ मत पाउनुभएको थियो ।
व्यास वडा नं ४ बाहेक तेह्र वटा वडामा काँग्रेसको पूरै समूह विजयी भएको मुख्य निर्वाचन अधिकृत अमरराज पौडेलले बताउनुभयो । वडा नं ४ मा भने एमालेले अध्यक्षसहित चार सदस्यमा विजय हासिल गरेको छ ।
यसैगरी म्याग्दे गाउँपालिका अध्यक्षमा काँग्रेसकी माया राना चार हजार ५४२ मत ल्याएर विजयी हुनुभएको छ । उहाँका निकटतम प्रतिद्वन्द्वी एमालेका श्रीप्रसाद श्रेष्ठले तीना हजार ४६१ मत पाउनुभएको छ ।
उपाध्यक्षमा काँग्रेसकै बालकृष्ण घिमिरे चार हजार ५९२ मत ल्याई विजयी हुनुभएको छ । उहाँका निकटतम प्रतिद्वन्द्वी एमालेकी रत्ना घिमिरेले तीन हजार १५४ मत पाउनुभएको छ । सोही गाउँपालिकाका वडा नं १, ३, ४ र ५ मा काँग्रेसबाट वडाध्यक्षसहित पूरै समूह र वडा नं २, ६ र ७ मा वडाध्यक्षसहित एमालेको पूरै समूह विजयी भएको निर्वाचन अधिकृत नवराज आचार्यले बताउनुभयो ।
