घट्नास्थलमा प्रहरी उपस्थिति बाक्लो छ । तस्विरः एएफपी
लन्डन । बेलायतको म्यानचेस्टर सहरमा सोमबार राति एक साङ्गीतिक कार्यक्रमस्थलमा गराइएको आत्मघाती हमलाको इस्लामिक स्टेट (आइएस) समूहले जिम्मेवारी लिएको छ । सङ्गीतमय बनिरहेको साँझलाई कार्यक्रमको अन्तमा अमेरिकी कलाकार एरियाना ग्रान्डेको प्रस्तुति सकिएलगत्तै स्थानीय समयानुसार राति १०ः३५ बजे म्यान्चेस्टर सङ्गीतस्थल परिसरमा भयानक आवाजसहित उक्त बम बिस्फोट भएको थियो ।
घटनामा २२ जनाको ज्यान गएको थियो भने करिब ६० जना घाइते भएका थिए । घाइते सबैजनाको स्थानीय विभिन्न अस्पतालमा उपचार भइरहेको छ ।
प्रशासनले हमलाकारीलाई चिनेको प्रधानमन्त्री मेको दावी
लन्डन । बेलायतकी प्रधानमन्त्री टेरेजा मेले आत्मघाती हमलामा संलग्न व्यक्तिको बारेमा प्रहरीलाई थाहा भएको बताउनुभएको छ ।
प्रहरीलाई आक्रमणको मुख्य योजनाकार र आक्रमणकारीबारे थाहा भएको बताउँदै अनुसन्धान जारी रहेकाले सबैको नाम सार्वजनिक नगरिएको प्रधानमन्त्री मेले टेन डाउनिङ स्ट्रिट बाहिर भएको सङ्कटकालीन सुरक्षा समितिको अध्यक्षताका क्रममा बताउनुभयो ।
प्रधानमन्त्रीले अस्पतालमा उपचारारत कैयौँ महिला तथा बालबालिकालगायतलाई गहिरो चोट लागेकाले उनीहरु जीवनका लागि अस्पतालमा सङ्घर्ष गर्दै रहेको बताउनुभयो । मेले छिट्टै म्यानचेस्टरको भ्रमण गरी मृतकका आफन्तजन र घाइते व्यक्ति तथा उनीहरुका परिवारलाई समवेदना दिने बताउनुभएको छ ।
प्रधानमन्त्री मेले म्यानचेस्टर आक्रमणलाई यहाँको इतिहासमै भएको सबैभन्दा हृदय बिदारक आतङ्कवादी आक्रमणको संज्ञा दिनुभएको छ ।
त्यसैगरी प्रधानमन्त्रीले घटनाले बेलायतका सम्पूर्ण दल तथा नागरिकलगायत विश्व समुदायलाई दुःखित तुल्याएको बताउनुहुँदै सम्पूर्ण राजनीतिक दलले निर्वाचनका सम्पूर्ण कार्यक्रम हाललाई स्थगित गरेको बताउनुभएको छ ।
एक पक्राउ- प्रहरी
प्रहरीले आतङ्कवादी आक्रमणमा सम्लग्न रहेको आशङ्कामा एक २३–बर्षिय यूवकलाई नियन्त्रणमा लिई अनुसन्धान अघि बढाएको यहाँको प्रहरीले मङ्गलबार जनाएको छ । आक्रमणमा सम्लग्न भएको आशङ्कामा एक यूवकलाई सुरक्षा नियन्त्रणमा लिएको बताउदै घटनामा उसको सम्लग्नता थियो वा थिएन भन्ने विषयमा छिट्टै जानकारी बाहिर आउने प्रहरीद्वारा जारी विज्ञप्तिमा जनाइएको छ ।
