प्रधानमन्त्री शेरबहादुर देउवाले बाँकेको राप्ती–सोनारी गाउँपालिका–४ लालपुरका बाढीपीडित परिवारलाई तयारी खाद्यान्न चिउरा, चाउचाउ, दालमोठ, नून, खाने तेल, पिउने पानी र त्रिपाल प्रदान गर्नुहुँदै । तस्बिर ः रोशन सापकोटा, रासस
काठमाडौँ, १ भदौ । प्रधानमन्त्री शेरबहादुर देउवाले आज मध्य र सुदूरपश्चिमका तीन जिल्लाका बाढी प्रभावितलाई राहत वितरण गर्नाका साथै प्रभावित क्षेत्रको अवलोकन गर्नुभएको छ ।
प्रधानमन्त्रीले बाँकेको राप्ती सुनारी गाउँपालिकाको कमैया डाँडा, बर्दियाको कोठिया गाउँ र कैलालीको टीकापुरमा बाढीबाट विस्थापितसँग साक्षात्कार गरी राहत सामग्री वितरण गर्नुभएको हो । प्रधानमन्त्रीले कमैयाडाँडामा बाढीबाट आफ्ना ११, नौ र सात वर्षका तीन छोरी गुमाएका कमिलाल थारुलाई रु छ लाखको चेक र राहत सामग्री हस्तान्तण गर्नुभयो ।
प्रधानमन्त्रीले देउवाले बाढीबाट धनजन गुमाएकाहरुलाई क्षतिपूर्ति रकम र घर बनाउन निश्चित रकम दिइने घोषणा गर्नुभयो । उहाँले भन्नुभयो, “अहिले तत्काल अस्थायी बासस्थानका लागि केही रकम निकासा गरिसकिएको छ, छिट्टै तपाईंहरुले पाउनुहुने छ ।”
यस्तै प्रधानमन्त्रीले बर्दियाको गुलरिया नगरपालिकाको बाढी प्रभावित वडा नं ८ को कोठिया गाउँमा पनि बाढी प्रभावितसँग साक्षात्कार गरी राहत वितरण गर्नुभएको छ । प्रधानमन्त्रीले बाढीको दीर्घकालीन र तात्कालीन समाधानका लागि सरकारले छिट्टै नयाँ कार्यक्रम ल्याउने जानकारी दिनुभयो । सरकारले घाइतेको निःशुल्क उपचार व्यवस्था गरेको बताउँदै उहाँले बाढीले घर बगाएकाहरुलाई पनि सरकारले निर्णय गरेर रकम निकासा गरिने छ भन्नुभयो । त्यस्तै टीकापुरमा पनि प्रधानमन्त्रीले पीडितसँग साक्षात्कार गरेर राहत वितरण गर्नुभयो ।
राहत, उद्धार र क्षतिपूर्तिका लागि निर्देशन
प्रधानमन्त्रीले मध्य र सुदूरपश्चिमका सेना, प्रहरी, सशस्त्र प्रहरीलगायत क्षेत्रीय प्रशासक र प्रजिअलाई राहत, उद्धार र क्षतिपूर्ति वितरणमा कुनै कमजोरी नहुने गरी काम गर्न निर्देशन दिनुभएको छ । बाँकेको नेपालगन्जमा प्रभावित क्षेत्रको उद्धार र राहतमा खटिएका सुरक्षा निकायका अधिकारी र उच्चपदस्थ कर्मचारीलाई निर्देशन दिँदै प्रधानमन्त्रीले भन्नुभयो, “प्राकृतिक विपत्तिमा परेकालाई कुनै गुनासो नआउने गरी काम गर्नुहोस् ।”
प्रधानमन्त्रीले बाढीपीडितका लागि आवश्यक खाद्यान्न दिन, उपचार गर्न तथासरुवा रोग लाग्न नदिन अहिले नै ध्यानमा राखी कार्यक्रम लागू गर्न पनि निर्देशन दिनुभयो । “राहतमा मैले कुनै गुनासो सुन्न नपरोस्”, प्रधानमन्त्रीले भन्नुभयो, “तपाईंहरुले उहाँहरुको स्वास्थ्यलाई पनि ख्याल गरेर काम गर्नुहोस् ।”
प्रधानमन्त्री शेरबहादुर देउवाले बिहीबार बाढी प्रभावित भ्रमणपछि कैलालीको टिकापुरमा बाढी पीडितलाई सहयोग हस्तारण गर्दै । तस्बिर ः रोशन सापकोटा, रासस
प्रधानमन्त्रीद्वारा बाढी प्रभावित क्षेत्रको निरीक्षण
गुलरिया (बर्दिया), १ भदौ । प्रधानमन्त्री शेरबहादुर देउवाले बर्दियाको बाढी प्रभावित क्षेत्रको आज हवाई तथा स्थलगत निरीक्षण गर्नुभएको छ ।
गुलरिया नगरपालिका–८ स्थित गोलपार्कमा बाढी विस्थापितसँग भेटघाट गर्नुहुँदै प्रधानमन्त्री देउवाले सरकारले सक्दो चाँडो क्षतिपूर्ति उपलब्ध गराउने बताउनुभयो । उहाँले बाढी पीडितलाई राहत उपलब्ध गराउन सरकार लागिपरेको बताउनुभयो ।
“निर्धक्क साथ बस्नुस्, सरकारले राहत उपलब्ध गराउँछ,” उहाँले भन्नुभयो । बाढीबाट अत्यधिक धनजनको क्षति भएकामा प्रधानमन्त्री देउवाले दुःख व्यक्त गर्नुभयो । तत्काल क्षति अनुसारको सहयोग गर्न नसके पनि बाढी पीडितलाई औषधि उपचार, बिचल्लीमा परेकालाई लत्ताकपडा तथा खाद्यान्न उपलब्ध गराउने उहाँले आश्वासन दिनुभयो ।
प्रधानमन्त्रीका साथमा सिँचाइमन्त्री सञ्जयकुमार गौतम रहनुभएको छ । बाढीबाट बर्दियामा एक हजारभन्दा बढी परिवार विस्थापित भएका छन् । बाढी पीडित अहिले जिल्लाका ४१ वटा विद्यालयमा शिविर खडा गरेर बस्दै आएका छन् ।
