बिहीबार, माघ ४ २०७४ | Thu, January 18, 2018
नेपालको समय: १३:४५ | UK Time: 08:00

सलमान ऐश्वर्या पहिलोपटक भिड्दै

विनेपाली
२०७४ पुष १९ गते ११:१९


मुम्बई । सलमान खान र उनकी पूर्व प्रेमिका ऐश्वर्या राय बच्चन पहिलो पटक बक्स अफिसमा भिड्दैछन् । ऐश्वर्या र अनिल कपुर अभिनित ‘फन्ने खान’ र सलमान खान-ज्याकलिन फर्नाडिस अभिनित ‘रेश–३’ एउटै मितिमा प्रदर्शन हुने भएको छ । दुबै फिल्म आउंदो १५ जुनमा रिलिज हुने भएपछि भिडन्त पक्का भएको हो । यो भिडन्तले कसलाई फाइदा र कसलाई बेफाइदा हुने हो अहिल्यै भन्न सकिन्न । यति पक्का हो भिडन्त भएपछि दुई मध्ये एकलाई घाटा निश्चित छ ।

सन् २०१७ को सुरुमा शाहरुख खान र ऋतिक रोशन भिडेका थिए । शाहरुख अभिनित ‘रइस’ र ऋतिक अभिनित ‘काबिल’ एउटै मितिमा प्रदर्शन हुँदा दुबैलाई घाटा भयो । तुलनात्मक रुपमा ‘रइस’ को ब्यापार राम्रो भएपनि एउटै मितिमा फिल्म रिलिज हुँदा दुबैलाई घाटा भएको निष्कर्ष फिल्मी पण्डितहरुले निकालेका थिए । सलमान र ऐश्वर्या मात्रै होइन, अन्य केही कलाकारको फिल्मबीच मज्जैको भिडन्त हुने भएको छ बलिउड बक्स अफिसमा ।

बलिउडमा सार्वजनिक भएको फिल्म प्रदर्शनको सूची अनुसार १३ अप्रिलमा भारतको अहिलेसम्मकै महंगो भनिएको २.० र अक्टुबर प्रदर्शन हुने भएको छ । २.० मा रजनीकान्त र अक्षयकुमारले अभिनय गरेका छन् भने अक्टुवरमा वरुण धवनले मुख्य भुमिका निर्वाह गरेका छन् ।

जोन अब्राहम अभिनित ‘परमाणु’ र रानी मुखर्जी अभिनित ‘हिचकी’ पनि एउटै मिति २३ फेब्रुअरीमा प्रदर्शन हुने भएको छ । पछिल्लो समय चर्चामा रहेकी कंगना रनौत अभिनित मणिकर्णिका र टाइगर श्राफ अभिनित बागी पनि एउटै मितिमा प्रदर्शन हुने भएको छ । २७ अप्रिलमा प्रदर्शन हुने दुबै फिल्मका कलाकारले आफ्नो महत्वकांक्षी फिल्म दावी गर्दै आएका छन् ।

२६ वर्षपछि अमिताभ र ऋषिकपुर
अमर अकबर एन्थोनी, कभी कभी, नसीब जस्ता फिल्ममा एकसाथ देखिएका अमिताभ बच्चन र ऋषि कपुरले २६ वर्षपछि स्क्रिन शेयर गरेका छन् । उनीहरुले अभिनय गरेको ‘१०२ नट आउट’ यही वर्ष रिलिज हुने भएको छ । हेर्न बाँकी छ उनीहरुको जोडीको प्रभाव दर्शकमा कस्तो पर्ने छ ।

प्रतिक्रिया

सम्बन्धित सामाग्री

फेसबुक