बुधबार, असोज १० २०७५ | Wed, September 26, 2018
नेपालको समय: १६:३५ | UK Time: 11:50

भ्यालेन्टाइन डे

डा. बच्चु कैलाश कैनी
२०७४ माघ २८ गते १०:३७

भ्यालेन्टाइन डे को दिनमा
माया साटासाट गर्ने दिनमा
मायासंग माया मात्रै हैन
मायासंग पैसा साटिएको छ
पैसासंग माया साटिएको छ
दिलसंग दिल मात्रै हैन
दिलसंग उपहार
र, उपहारसंग दिल पनि साटिएको छ ।

भ्यालेन्टाइन डे को दिनमा
मायाको नाममा उपहार फस्टाएको छ
उपहारको नाममा ब्यापार फस्टाएको छ
व्यापारको नाममा ब्यापारी फस्टाएको छ
माया अब माया मात्रै रहेन
यो नाफा घाटाको ब्यापार रहयो
यो उपहारको जोड घटाउ रहयो
यो लिने दिनेको मोलमोलाई रहयो
त्यसैले भ्यालेन्टाइन डे अब
भ्यालेन्टाइन डे मात्रै रहेन
यो त मायाको नाममा ब्यापार भयो ।

यहाँ मायाको नाममा
वा, भ्यालेन्टाइन डे को नाममा
रोजको ब्यापार बढेको छ
कार्डको ब्यापार बढेको छ
उपहारको ब्यापार बढेको छ
विज्ञापनको बिगबिगी बढेको छ
व्यापारको चलखेल बढेको छ
मायाको बिज्ञापन बढेको छ ।

माया ब्यापार हैन
माया उपहार मात्रै हैन
माया देखाउनु मात्रै हैन
माया कुनै नाफा घाटा हैन
माया त दिलसंग दिल जोडिनु हो
माया त एउटा मुटुलाई
अर्को मुटुले निस्वार्थ स्वीकार गर्नु हो
माया पैसामा हैन
माया कार्डमा हैन
माया उपहारमा हैन
माया त मन, मुटु र मष्तिस्कमा हुन्छ
एउटा दिलको माया अर्कोमा सुनिन्छ
एउटा मायाको ढुकढुकी अर्कोमा सुनिन्छ
साँचो माया कुनै उपहार बिना नै सुनिन्छ ।

आजकलको कस्मेटिक दुनियाँमा
यहाँ मायाको नाममा
सच्चा माया चाहिएको छ
भ्यालेन्टाइन डे को नाममा
सच्चा भ्यालेन्टाइन चाहिएको छ
मायासंग माया साट्ने
र, एउटा दिलसंग अर्को दिल सांटने
साँचो प्रेमी र प्रेमिका चाहिएको छ
यहाँ साँच्चै माया सांटने
भ्यालेन्टाइन डे चाहिएको छ ।

१४ फेब्रुवरी २०१८
लन्डन, बेलायत ।

प्रतिक्रिया

सम्बन्धित सामाग्री

फेसबुक