काव्यिक शुभकामना नयां वर्ष २०७५ सालको

एकाबिहानै
बादलुको पर्दा खोलेर
किरणको जुलुस
शुभकामना बोकेर
वसन्तको ध्वजा पतका फहराउन
हर्ष, उल्लास, उमंगमा
खातका खात
योजनाका गाताहरु बोकेर
शान्तिको लालीमा
खेत, पाखा, आली, कान्ला
घर, आंगनमा छर्न
आरोह, अवरोहको यात्रामा
सुख,सम्वृद्धि, आरोग्यताको
मन्द पवनमा
करोडौं मुटु चलोस् भनेर
आउंदैछ नयां वर्ष २०७५
अनुपम स्वर्णीम शुभकामना बोकेर …

त्यसैले तिमी
स्वच्छ मन, वचन र कर्मले
मनका तरंगहरु
मायाका बिम्बहरु
मुटुका स्पन्दनहरु
सोचका अलंकारहरु
इन्द्रेणीले श्रृंगारेर
उत्कृष्ठ उत्सर्गमा
शान्तिको स्वाशमा
निरन्तर मुटु खेलोस् भनेर
स्वर्णीम मंगल कलश राखेर
मनका झ्यालहरु खोल
मनका ढोकाहरु खोल
मनका कन्तुरहरु खोल
जीवनको खेत पाखाहरुमा
धर्म, कर्म आशा भरोसाका
र संस्कृतिका कोदाली चलाउंदै
प्रज्वलित स्वच्छ विचारका पालुवाहरु
विश्वासको पवित्र मन्दिरमा फक्राई रहन
शान्तिमा जीवन सगरमाथा उठाउन

इन्द्रेणीका गाउं शहर बस्तीहरुमा
शान्तिको ज्योती फिंजाउन
अनि
आगो र पानीको
विजय उत्सव मनाउन …!
आउंदैछ नयां वर्ष २०७५
स्वर्णीम शुभकामना बोकेर

हाम्रो तिमीलाई, उसलाई, सबैलाई
हार्दिक मंगलमय शुभकामना
शुभकामना, शुभकामना शुभकामना
नयां वर्ष २०७५ सालको

प्रतिक्रिया

सम्बन्धित सामाग्री