ब्रिटेन नेपाल एकेडेमिक काउन्सिलमा डा. अधिकारी

लन्डन । बेलायतस्थित प्राज्ञहरुको एउटा संस्था ब्रिटेन नेपाल एकेडेमिक काउन्सिल (प्रज्ञा परिषद) मा नयां नेतृत्व चयन भएको छ ।

गत १६ देखि १७ अप्रिलसम्म डरहाम युनिभर्सिटीमा आयोजित नेपाल अध्ययन दिवस (नेपाल कन्फेरेन्स) का अवसरमा भएको परिषदको साधारणसभाले अक्सफोर्ड विश्वविद्यालयका रिसर्च फेलो तथा नेपाल अध्ययन केन्द्रका पूर्व कार्यकारी निर्देशक डा. कृष्ण अधिकारीलाई अध्यक्ष चुनेको हो । अधिकारी यसअघि संस्थाको महासचिव थिए ।

साधारणसभाले ४ वर्षे कार्यकालका लागि महासचिवमा लन्डन स्कुल अफ इकोनोमिक्सकी डा. पुनम यादव र कोषाध्यक्षमा युनिभर्सिटी अफ बर्मिङहमका डा. फ्रेजर सुग्डेनलाई निर्वाचित गरेको छ ।

२३ मे, सन् २००० मा स्थापित उक्त प्राज्ञिक संस्थामा यसअघि प्राध्यापकहरु डा. सूर्य सुवेदी, माइकल हट र डेभिड गेल्नरपछि डा. अधिकारी चौंथो अध्यक्षका रुपमा निर्वाचित भएका हुन् ।

यसैबीच, दुई दिने उक्त नेपाल अध्ययन दिवसमा नेपाल र नेपाली संस्कृति सम्बन्धि ३५ वटा भिन्न भिन्न कार्यपत्र प्रस्तुत गरिएको डा. अधिकारीले जानकारी दिए । सम्मेलनमा नेपालसंग सम्बन्धित राजनीतिक पहिचान र संस्कृति, भूकम्प, बसाईं सराइ, स्वास्थ्य, उर्जा, विकास जस्ता मुलभुत विषयमा अन्तरक्रिया तथा छलफल गरिएको थियो ।

उक्त सम्मेलनमा बेलायत, स्पेन, पोल्याण्ड, जर्मनी, नेपाल लगायत देशबाट आएका प्राज्ञ, अनुसन्धाता तथा अन्य बुद्धिजिवी गरि करिब ७० जनाको सहभागिता थियो ।

उक्त अवसरमा परिषदले डा. मारिना कोर्जेनेभिकालाई पहिलोपटक पिएचडी शोधपत्र पुरस्कार प्रदान गरेको छ ।

तस्विर- सारा पार्कर

प्रतिक्रिया

सम्बन्धित सामाग्री