मंगलबार, पुष ३ २०७५ | Tue, December 18, 2018
नेपालको समय: १६:४३ | UK Time: 10:58

बेलायतमा म्हः पूजा एवं नेपाल सम्वत् (फोटो फिचर)

विनेपाली
२०७५ कार्तिक २३ गते ३:५१

लण्डन ।  नेपाली कला संस्कृति र परम्परा अब नेपालमा मात्र सिमित रहेन । पर्यटन भित्राउन समेत महत्वपूर्ण भूमिका रहेको नेपाली संस्कृति नेपालीहरु प्रवासिने क्रम बढेसँगै विश्वका विभिन्न कुनामा नेपाल र नेपाली परम्परा सम्वन्धि विविध कार्यक्रम गर्न थालिएको छ ।

यसै साता पनि बेलायतमा नेवारी समुदायको महान पर्व म्हः पूजा एवं नेपाल सम्वत् ११३९ वृहत सांस्कृतिक कार्यक्रमका साथ मनाइएको छ ।

पासा पुच गुठी साउथ ईष्ट लण्डनको आयोजनामा सम्पन्न उक्त कार्यक्रममा नेवारी परम्परा अनुरुप लाईनबद्ध भएर दुनामा नेवारी परिकार र ऐलाको स्वाद लिएको दृश्य निकै रमणीय र नेपालकै झल्को दिने देखिन्थ्यो ।

म्हः पूजा गर्न करिब दुई सय जनाको सहभागी थियो । नेवार समुदाय मात्र नभएर अन्य समुदाय पनि म्हः पूजामा सहभागी भएका थिए ।

 

नेवारी भाषामा म्हः भनेको शरीर हो । आफ्नो शरीरलाई परमात्मा मानेर आफूले आफूलाई आराधना गरी शरीर भित्रको चेतनालाई पूजा गर्ने यस पर्वको मान्यता छ ।

प्रवासमा रहेर पनि नेवारी परम्परा, कला र संस्कृतिको संरक्षण र प्रवर्धनका लागि मात्र नभएर नयाँ पुस्तामा हस्तान्तरण गर्नुका साथै अन्य समुदायमा पनि प्रवर्धनका लागि यस्ता किसिमका कार्यक्रम गर्नु संस्थाको मुल उदेश्य रहेको अध्यक्ष सुशिल प्रजापतिले जानकारी दिए ।

कुमारी यात्रा र झांकीबाट शुरु गरिएको सांस्कृतिक कार्यक्रममा नेवारी समुदायमा लोकप्रिय मानिने धिमे बाजा, लाखे नाच, मंजुश्री नृत्य, हुलाँ प्याखँ साथै विविध साँस्कृतिक कार्यक्रम प्रस्तुत गरिएको थियो ।

पासा पुच गुठी बेलायत केन्द्रिय अध्यक्ष कुमार श्रेष्ठको प्रमुख आतिथ्यमा सम्पन्न कार्यक्रममा बेलायत स्थित विभिन्न संघ संस्थाका प्रतिनिधिहरुको बाक्लो उपस्थिति रहेको थियो ।

करिब पाँच सय दर्शक सहभागी रहेको सो कार्यक्रम कलाकार मनिष कुमार श्रेष्ठले संचालन गरेका थिए ।

शब्द/तस्विर- कुशल श्रेष्ठ

प्रतिक्रिया

सम्बन्धित सामाग्री

फेसबुक