मंगलबार, चैत १२ २०७५ | Tue, March 26, 2019
नेपालको समय: १०:१८ | UK Time: 04:33

युकेमा माघेसंक्रान्ति मनाइयो

विनेपाली
२०७५ पुष २९ गते १९:५४

लण्डन । युकेमा रहेका मगरहरुले माघे संक्रान्ति पर्व मनाएका छन् । नेपाली पात्रो अनुसार मंगलबार माघेसंक्रान्ति परे पनि युकेमा सार्वजनिक विदा नपाइने भएका कारण गत सातादेखि नै विभिन्न स्थानमा पर्व मनाइएको हो ।

मगर संघ युकेका अनुसार गत ५ जनवरीमा मगर संघ स्वीण्डन शाखाले माघेसंक्रान्ति मनायो भने हिजो शनिबार मगर संघ वेल्स शाखा, वेम्बली शाखा, वेष्ट लण्डन शाखा, युनाइटेड हयाम्पसायर–बर्कसायर–सर्रे शाखा, केन्ट र रेडिङ शाखाले माघेसंक्रान्ति विभिन्न कार्यक्रमका साथ मनाएका छन् । त्यसैगरी, प्लमस्टिड शाखाले आउँदो शनिबार मनाउँदैछ ।

यसैबीच, युनाइटेड ह्याम्पसायर–बर्कसायर–सर्रे शाखाले पितृपूजा तथा विभिन्न साँस्कृतिक कार्यक्रमका साथ माघेसंक्रान्ति पर्व मनायो । पुजारी ओमप्रसाद थापा, पुजारीहरु ओमबहादुर थापा र गणेश थापाले पितृपूजा गरेका थिए ।

अध्यक्ष लेखबहादुर रानाको अध्यक्षतामा भएको सो कार्यक्रममा कृषा थापा र अर्जुन थापाले माघेसंक्रान्तिका बारेमा नवपुस्तालाई जानकारी दिएका थिए । शाखाका सचिव बीर बलालले कार्यक्रम अवधिमा केही विपत्ति आएमा अपनाउनुपर्ने आकस्मिक सुरक्षाका बारेमा सूचना दिएका थिए ।

उपाध्यक्ष नरेश थापाले स्वागत मन्तब्य दिएका थिए भने कार्यक्रमका प्रमुख अतिथि मगर संघ युकेका उपाध्यक्ष अनिता राना र विशेष अतिथि नेपाल पत्रकार महासंघ युकेका अध्यक्ष नरेश खपाङ्गीमगर थिए ।

कार्यक्रममा यसवर्ष जिसिएससी, ग्राजुयसन, मास्टर्स गरेका विद्यार्थीलाई सम्मान गरिएको थियो । यसैगरी आजिवन सदस्यहरु र शाखालाई विशेष सहयोग गर्ने सदस्यहरुलाई प्रमाणपत्र वितरण गरिएको थियो ।

नेपालबाट आएकी कलाकार शीला गुरुङ र गायक मनसुधन थापाले दोहोरी गाएका थिए भने कलाकार बीरबहादुर थापाको टोलीले लाइभ गीत प्रस्तुत गरे । स्थानीय कलाकारहरु कल्पना थापा, मुना थापा, मिरिन पाइजा, अस्मिता थापा, दृष्टि पुर्जा, मुना गर्बुजा, तारा गर्बुजा, विमला गर्बुजा, सुरक्षा राना, मेलिना राना, विपना पुन, गीता पाइजा र रैसा रानाले नृत्य गरेका थिए ।
शाखा अध्यक्ष लेखबहादुर राना लगायतको टोलीले सोरठी नृत्य प्रस्तुत गरेको थियो । मगर महिला टोलीले प्रसाद र अतिथि सत्कारको भूमिका निर्वाह गरेका थिए ।

प्रतिक्रिया

सम्बन्धित सामाग्री

फेसबुक