शनिबार, फागुन ११ २०७५ | Sat, February 23, 2019
नेपालको समय: २३:४१ | UK Time: 17:56

बेलायती बालिकाको उपचारमा सहयोगका लागि नेपालीले गरे च्यारिटी

गणेश पुन
२०७५ माघ २८ गते २१:०९

फोक्स्टन । यही २ फेब्रुवरी, शनिवार साँझ फोक्स्टनस्थित हार्बी ग्रामर स्कूलको हलमा क्यान्सर पीडित ५ वर्षीया बालिका माया नाशको उपचार खर्च जुटाउन नेपाली खानासहित एक च्यारटी डिनर आयोजना गरियो । बाग्लुङ समाज युके र फोक्स्टन नेपाली समाजका पूर्व अध्यक्ष एवम् समाजसेवी दीपककुमार काउचाको विशेष पहल र सक्रियतामा सो कार्यक्रम सम्पन्न भएको थियो ।

चिकित्साशास्त्रका अनुसार न्युरोबलास्टोमा नामक भयानक क्यान्सर विशेष गरी बाल्यावस्थामा देखिने रोग हो । बालिका माया नाशमा यो रोग उनी तीन वर्षकी हुँदा देखिएको थियो । मायाको उपचार युकेमै भइरहे पनि रोगको अवस्थालाई थप बढ्नबाट रोकथाम गर्ने काम मात्र भइरहेको छ । यस रोगको पूर्ण उपचार यहाँ सम्भव छैन । चिकित्सकहरूले यसको पूर्ण उपचारका लागि अमेरिकाको न्युयोर्कमा मात्र सम्भव हुने कुरा मायाका बाबा आमालाई सल्लाह दिएका छन् । यसको उपचार खर्च २ लाख ४३ हजार पौण्ड लाग्ने कुरा पनि प्रष्ट्याएका छन् ।
क्यान्सर पीडित बालिका मायाका बाबाआमाले मायालाई यस रोगबाट मुक्त गराउनका लागि विभिन्न सामाजिक सञ्जालमार्फत आर्थिक सहयोगका लागि याचना गरिरहेका छन् । यस्तो आर्थिक सहयोगको याचना पढेपछि दीपककुमार काउचा आफूले पनि जसरी र जति हुन्छ सहयोग गर्ने अठोट लिए । साथीभाइहरूको सरसल्लाह र सहकार्यबाट मानवीय कर्तव्यको महत्व राख्ने यो च्यारिटी डिनरको आयोजना गर्न सम्भव भएको हो । यस प्रकारका कार्यक्रम र सहयोगबाट उपचारार्थ रकम उठ्न सके बालिकामायालाई एक सबल जीवन बाँच्न सहयोग पुग्नेछ ।

बेलुका झन्डै ६ बजेदेखि सुरु भएको उक्त च्यारिटी डिनर साँझमा स्थानीय नेपाली समुदाय, १ आरजीआरमा सेवारत दाजुभाइ, फोक्स्टन मेयरका साथै स्थानीय काउन्सिलरहरूसहित झन्डै दुई सयजनाको उपस्थिति थियो । स्थानीय कलाकारहरूद्वारा नेपाली संस्कृति झल्किने विभिन्न नृत्य र केही गीतहरु पनि प्रस्तुत गरिएका थिए । विभिन्न सामानहरूको अक्सन र राफल ड्र गरेर उक्त साँझमा ५ हजार ५५६ पौण्ड जति रकम उठेको थियो । उठेको सम्पूर्ण रकम बालिका मायाको उपचारका लागि प्रदान गरिसकिएको जानकारी आयोजक दिपक काउचाले बताए ।

बेलायतमा अचेल विभिन्न व्यक्ति र नेपाली संघसंस्थाहरूले आफ्नो फुर्सद निकालेर विभिन्न सहयोगका लागि यस्ता च्यारिटी कार्यक्रमहरू आयोजना गर्दै आए पनि यो च्यारिटी डिनर साँझ अत्यन्त पृथक रहेको र सफल भएको भनी धेरैले प्रशंसा गरेका छन् ।
माया नाशको बाबा आमा बेलायती नागरिक हुन् । यस्ता खाले च्यारिटी कार्यक्रम आयोजनाले हामी नेपाली मूल र अन्य मूलका समुदायबीचको अन्तरसम्बन्ध बलियो बनाउन सहयोग मिल्ने कुरामा विश्वास गर्न सकिन्छ ।

प्रतिक्रिया

सम्बन्धित सामाग्री

फेसबुक