बुधबार, साउन १ २०७६ | Wed, July 17, 2019
नेपालको समय: ०८:३२ | UK Time: 03:47

लघुकथा: पागलपन

डा. बच्चु कैलाश कैनी
२०७५ फागुन ६ गते २२:००

राजेश र ममताको बीचमा एक्कासी फाटो आएको खुब हल्ला चल्यो । ममताले उसका सबै साथीहरुलाई भनिछ, ‘राजेश पागल हो । आजकल उ मलाई अति नै गर्छ । त्यसैले अहिले म उसंगको यो सम्बन्धबाट टाढा हुँदैछु र नयाँ प्रकारले जीवन बाँच्ने सोचेको छु  ।’

म छक्क परें । मेरो लागि ममता र राजेश दुवै उत्तिकै मिल्ने साथीहरु हुन् । मलाई लाग्थ्यो दुवैको अतीत र वर्तमानको म एक्लो साक्षी थिएँ र हुँ पनि । हामी तिनै जना स्कुल जीवनदेखि कलेजको उत्तरार्ध अर्थात मास्टर्स पढ्दासम्म संगै छौं ।

हामी तिनै जना मिल्ने साथी भएपनि राजेश र ममता अलि फरक थिए । उनीहरु एक अर्कोलाई मन पराउँथे ।  अर्थात, ब्वाईफ्रेन्ड र गर्लफ्रेन्डको रुपमा एक अर्कोलाई हेर्थे, बुझ्थे र त्यस्तै ब्यबहार पनि गर्थे ।  यो कुरा हाम्रो समूहमा लुकेको थिएन ।

यी दुईको माया प्रिती धेरै जनाको लागि उदाहरण थियो । एकार्कोलाई माया गर्थे र सबै कुरामा सहयोग गर्थे । उनीहरु बीच अगाध माया, प्रेम र  विस्वास थियो । एक अर्काको भावनाको कदर गर्थे र एक आपसमा आदर पनि । दुईको बिचमा कुनै कुरा लुक्दैनथ्यो । कतिसम्म भने एक अर्कोको मोबाइल निर्वाध हेर्थे र चलाउँथे ।

मैले राजेशलाई सम्पर्क गरें । उसले कुनै प्रतिक्रिया दिएन । केवल यति भन्यो, ‘जे सोध्नु  छ उसैलाई सोध्नु ।’

अनि ममतालाई पनि सम्पर्क गरें, उसले पनि मलाई त्यही कुरा गरी, जुन अरु साथीहरुलाई सुनाएकी थिई । यी दुईबाट कुरा बुझ्ने प्रयत्न सफल भएन ।  किनकि यी दुवै जनाबाट केही कुरा खुस्केन ।

म छक्क परें । किन यस्तो भयो ? यी दुईको बिचमा किन यस्तो खाडल भयो ? थप कुरा बुझ्ने जमर्को गरें । मैले हाम्रै समूहका अरु मित्रहरुलाई पनि सम्पर्क गरें । सबैबाट उस्तै कुरा आयो । आजकल यी दुईको बीच फाटो आएको छ ।

मलाई नरमाइलो लाग्यो । मेरो मनमा धेरै कुराहरु खेले । मैले सोचें, यो भाग्यको खेल हो । लेखेको मात्रै हुन्छ, देखेको हुँदैन । हुन सक्छ, जे हुन्छ ठिकै हुन्छ । आदि, इत्यादि  कुराहरु खेले । मनमनै दुवैलाई सान्त्वना दिएँ ।

करिब एक हप्ता पछिको कुरा हो । मेरो घरमा एउटा खाम आएको रहेछ । हतारमा खोलें र पढें । ममता र राजेशको विवाहको निमन्त्रणा कार्ड आएको रहेछ ।

पहिला ममतालाई फोन गरें । उसले भनि, ‘ बेवकुफ ! मैले साथीहरुलाई जे भनेको थिएँ, ठिकै भनेको थिएँ । राजेश र म एक अर्कोको मायामा अति नै पागल भयौ । त्यसैले हामी दुवैले नयाँ प्रकारले जीवन बाँच्ने  सोच्यौं । हाम्रो सम्बन्धलाई थप उचाई दिने सोचेर हामी प्रेमी प्रेमिकाबाट जीवन साथी बन्दैछौ । अनि हाम्रो विवाहको तयारीको लागि एक एर्कोलाई समय दिने मौका कहाँ मिल्यो र ?’

राजेशलाई फोन गरें । उसले भन्यो, ‘ मित्र, सस्पेन्समा त छ मज्जा ।’  म दिल खोलेर हाँसे ।

उफ म पनि ! बल्ल यी दुईको पागलपनलाई बुझें ।  म पनि यिनीहरुको चिन्ताले झन्डै पागल भएको । पागलपनमा कुरा बुझे पनि पागल, नबुझे पनि पागल । राजेश र ममता दुवैलाई बधाई र शुभकामना ।

प्रतिक्रिया

सम्बन्धित सामाग्री

फेसबुक