राउतले ११ बूँदे सम्झौता कार्यान्वयन गरेनन्-सांसदहरु

प्रतिनिधिसभाको बुधबारको बैठकमा सहभागी सांसद । तस्वीर- रासस ।

काठमाडौँ, २९ फागुन – राष्ट्रियसभाको आजको बैठकमा सांसद बलराम बाँस्कोटाले सरकार र स्वतन्त्र मधेश गठबन्धनबीच सम्झौता हुनु सरकारको महत्वपूर्ण कार्य भए पनि सम्झौतालगत्तै स्वतन्त्र मधेशको नारा घन्केको अवस्थालाई ध्यान दिन सरकारको ध्यानाकर्षण गराउनुभएको छ ।

राष्ट्रियसभाको विशेष समयमा सांसद बाँस्कोटाले सम्झौतानुसार गठबन्धनका संयोजक सिके राउतले कार्यान्वयन गर्नुपर्ने नत्र सरकारले उनलाई गिरफ्तार गर्नुपर्ने सुझाव दिनुभयो । नेपालको संविधानले कुनै पनि दललाई प्रतिबन्ध लगाउने अधिकार नदिएको उल्लेख गरेको भन्दै सांसद बाँस्कोटाले संविधान नमान्नेलाई प्रतिबन्ध लगाउनुभन्दा पनि मूल धारमा ल्याउनुपर्नेेतर्फ सरकारको ध्यानाकर्षण गराउनुभयो ।

सांसद बद्रीप्रसाद पाण्डेले सरकार र राउतबीच भएको ११ बूँदे सम्झौतामा राउत मौन देखिएको बताउँदै सम्झौताको ११ बूँदामा सम्झौता आजैदेखि लागूहुने भनिए पनि सम्झौताकै भोलिपल्ट स्वतन्त्र मधेश लेखिएका तुल प्रदर्शन गरिएको प्रति सरकारको ध्यानाकर्षण गराउनुभयो ।

सांसद कमल वलीले राष्ट्रको उन्नति र विकासका लागि सपना देख्ने र नाकाबन्दीका बेलामा राष्ट्रभक्तिको भावनाबाट राष्ट्रलाई जोगाउन खोज्ने प्रधानमन्त्री केपी शर्मा ओली देशभक्त भएको बताउनुभयो ।

सांसद वृषेशचन्द्र लालले नेत्रविक्रम चन्द नेतृत्वको निर्वाचन आयोगमा दर्ता नभएको नेकपालाई प्रतिबन्ध लगाउनाले राजनीतिक स्वार्थका लागि निर्दोष मारिने र धनजनको क्षति हुने हुनाले त्यसतर्फ सरकारको ध्यान जानुपर्ने उल्लेख गर्नुभयो ।

सांसद रामचन्द्र राईले वातावरण संरक्षण गर्नका लागि इलेक्ट्रोनिक मोटरसाइकल र स्कुटर दर्ता गर्ने व्यवस्था गर्ने व्यवस्था मिलाउन सरकारको ध्यानाकर्षण गराउनुभयो । सांसद विन्दादेवी आलेले खाडी मुलुकमा लगाइएको प्रतिबन्धका कारण धेरै महिलाले यातना भोग्नुपरेको हुँदा सरकारले त्यसतर्फ ध्यान दिन आग्रह गर्नुभयो ।

सांसद प्रमिला कुमारीले थरुहट र मधेश आन्दोलनको छानबीनका लागि सर्वोच्च अदालतका पूर्वन्यायाधीश गिरीशचन्द्र लालको संयोजकत्वका गठित आयोगको प्रतिवेदन सार्वजनिक गर्न माग गर्नुभयो ।

सांसद कालीबहादुर मल्लले सरकारले चन्द नेतृत्वको पार्टीलाई प्रतिबन्ध लगाउन हतार गरेको उल्लेख गर्दै सो समूहलाई सरकारले वार्ता वा छलफलका लागि कति पटक पहल गरयो भन्नेबारे प्रधानमन्त्रीले नेपाली जनतालाई जानकारी दिनुपर्नेमा ध्यानाकर्षण गराउनुभयो । राष्ट्रियसभाका अध्यक्ष गणेश तिमिल्सिनाले लाल आयोगको प्रतिवेदन सार्वजनिक गर्ने मागमा विषयमा सरकारलाई अर्को बैठकमा जवाफ दिन निर्देशन दिनुभयो ।

पुल निर्माणलाई तीव्रता दिन माग 

राष्ट्रियसभाको शून्य समयमा बोल्ने सांसदले बर्खा शुरु हुन लागेको हुनाले पुल निर्माणलाई सरकारले तीव्रता दिनुपर्नेमा जोड दिइएको छ । बैठकमा सांसद दुर्गाप्रसाद उपाध्यायले लुम्बिनी पर्यटकीय र धार्मिक महत्वको स्थल भएको हुनाले त्यहाँ जाने बाटामा रहेको बेथानी पुल निर्माण अझै हुन नसकेको उल्लेख गर्दै पप्पु कन्स्ट्रक्सनले काम नगरेको हुनाले ठेक्का अर्कालाई दिएर भए पनि पुल निर्माण गर्नुपर्ने सुझाव सरकारलाई दिनुभयो ।

सांसद प्रकाश पन्तले पोखरामा रहेको विजयपुर पुल निर्माण भएको ११ वर्ष नपुग्दै भत्किन लागेको हुँदा बर्खायाम नलाग्दै निर्माण गर्न माग गर्नुभयो । सांसद नैनकला ओझाले देशमा सुकुम्बासी समस्या अझै पनि समाधान नभएको उल्लेख गर्दै कतिपय सुकुम्बासीका नाममा पुर्जासमेत नभएको भनी सरकारको ध्यानाकर्षण गराउनुभयो ।

सांसद रमेशजङ्ग राजमाझीले नेत्रविक्रम चन्द नेतृत्वको पार्टीलाई प्रतिबन्ध लगाउने अनि स्वतन्त्र मधेशको नारा लगाउने सिके राउतलाई मूल धारमा ल्याउने व्यवहारले कसैलाई काखा र कसैलाई पाखा भएको बताउनुभयो । सांसद रमेशप्रसाद यादवले २०७२ सालमा थरूहट र मधेश आन्दोलनको छानबीनका लागि सर्वोच्च अदालतका पूर्वन्यायाधीश गिरीशचन्द लालको संयोजकत्वका गठित आयोगको प्रतिवेदन सार्वजनिक गर्न माग गर्नुभयो ।

एकराज पाठक

पाठक राष्ट्रिय समाचार समिति (रासस) का प्रधानसम्पादक हुन्।

प्रतिक्रिया

सम्बन्धित सामाग्री