शुक्रबार, वैशाख ६ २०७६ | Fri, April 19, 2019
नेपालको समय: ०४:२० | UK Time: 23:35

बेलायतविरुद्ध उत्रिए भूतपूर्व गोर्खा, जुलाई १ मा लन्डनमा विशाल प्रदर्शन

विनेपाली
२०७५ चैत ७ गते ७:१५

काठमाडौँ- समान कामका लागि समान पेन्सन नदिएको भन्दै पूर्वगोर्खा सैनिकहरूले बेलायत सरकारविरुद्ध आन्दोलन घोषणा गरेका छन् । उनीहरूले जुलाई १ (असार १६) सम्ममा आफ्नो माग पूरा गर्न मंगलबार बेलायत सरकारलाई अल्टिमेटम दिएका छन् ।

पूर्व पेन्सनरहरूको संगठन ‘गोर्खा सत्याग्रह संयुक्त संघर्ष समिति’ ले जुलाई १ सम्म बेलायतमा भर्ती हुने प्रक्रिया र त्यसका लागि चलाइने तयारी कक्षामा पूर्ण प्रतिबन्ध लगाउने घोषणा गरेको छ । 

गोर्खा सत्याग्रह संयुक्त संघर्ष समितिका प्रमुख संयोजक कृष्ण बहादुर राईले अबको आन्दोलन निर्णायक हुने र बेलायतले कुनै पनि बहानामा गोर्खाहरुलाई गुमराहमा राख्न नसक्ने बताए ।

समितिका महासचिव एसबी घिसिङले जुलाई १ का दिन लन्डनमा हजारौं पूर्व बेलायती सैनिकलाई उतारेर दोस्रो चरणको आन्दोलन थाल्ने चेतावनी दिएका छन् । पूर्वगोर्खा सैनिकहरूको ओहदा हेरी ३४ प्रतिशतसम्म पेन्सन बढाउने बेलायती सरकारको गत फागुन २३ को घोषणाविरुद्ध आन्दोलन लक्षित भएको घिसिङले बताए । ‘हाम्रो माग शतप्रतिशत वृद्धि हो,’ उनले भने, ‘उत्ति नै जोखिम मोलेर उस्तै काम गरेपछि हामीलाई पेन्सन पनि उत्ति नै चाहिन्छ । तर, बेलायतले आफ्ना नागरिकलाई जति सुविधा हामीलाई कहिल्यै दिएको छैन, त्यो अन्याय हो र हामी यसको विरोध गर्छौं ।’

बेलायतले एकतर्फी रूपमा ३४ प्रतिशत पेन्सन वृद्धि गरेको र त्यसले एकल महिला, कटौतीमा परेका सेनाको समस्यालगायत विषयलाई सम्बोधन नगरेको पूर्वगोर्खा सैनिकहरूको भनाइ छ । ‘नाम मात्रको पेन्सन वृद्धि दुर्भाग्यपूर्ण र बदनियतपूर्ण षड्यन्त्र हो,’ समितिले बुधबार जारी गरेको विज्ञप्तिमा उल्लेख छ, ‘यसको हामी घोर आपत्ति र खेद प्रकट गर्छौं, के हामी भिखारी हौं ?’
३० वर्षदेखि समान कामका लागि समान सुविधा भन्ने माग राखेर पूर्वगोर्खा सैनिकहरू बेलायतविरुद्ध आन्दोलनरत छन् ।
बेलायतमा आमरण अनशनसमेत बसेपछि सरकारले उनीहरूको मागका सम्बन्धमा प्राविधिक अध्ययन गरी २२ मार्च २०१८ मा प्रतिवेदन सार्वजनिक गरेको थियो । बेलायत र नेपालका प्रतिनिधिका साथै आफूसमेत संलग्न वार्ता समिति गठन गरी प्रतिवेदन कार्यान्वयन हुनुपर्ने पूर्वसैनिकहरूको माग रहेको कान्तिपुरमा खवर छ ।

प्रतिक्रिया

सम्बन्धित सामाग्री

फेसबुक