भूतपूर्व गोर्खा सैनिकका समस्यामा प्रधानमन्त्रीको विशेष चासो

लण्डन । बेलायत भ्रमणमा रहनुभएका प्रधानमन्त्री केपी शर्मा ओलीले गोर्खाहरुको समस्यामा गम्भीर चासो देखाउनुभएको छ ।
मंगलबार बिहान नेपाली दूताबासमा भूतपूर्व गोरखा सैनिकहरुसित भएको भेटवार्तामा प्रधानमन्त्रीले तोकिएको समयभन्दा धेरै समय दिई गोरखाहरुको समस्या गम्भीरतापूर्वक सुन्नु भयो ।

शुरुमा भेटघाटका लागि १५ मिनेट मात्र दिइएकोमा प्रधानमन्त्रीले एक घण्टाको समय गोर्खाहरुलाई दिनु भएको थियो । त्यतिबेला एनआरएनए युके र ब्रिटेन नेपाल चेम्बर अफ कमर्सका प्रतिनिधि मण्डल भने बाहिर प्रतीक्षामा बसिरहेको थियो ।

भेटघाटमा गोर्खा भूतपूर्व सैनिकका संस्थाहरु गोर्खा भूतपूर्व सैनिक संघ (गेसो), गोर्खा सत्याग्रह र नेपाल भूतपूर्व सैनिक संघ (नेसा) सहभागी थियो । ब्रिटिश गोरखा वेलफेयर सोसाइटी भने सो भेटघाटमा सहभागी थिएन ।

सो अवसरमा गेसो सभापति कृष्णकुमार राई र गोर्खा सत्याग्रहका तर्फबाट निर्देशक ज्ञानराज राईले गोर्खा भूतपूर्व सैनिकहरुका समस्याका बारेमा प्रधानमन्त्री र उहाँको टोलीलाई जानकारी गराएका थिए ।

सभापति राईका अनुसार सो अवसरमा गोर्खाहरुले गतवर्ष प्राविधिक समितिले बनाएको १३ बुँदे प्रतिवेदन कार्यान्वयनका लागि दुईपक्षीय उच्चस्तरीय समिति गठनका लागि प्रधानमन्त्री ओलीसित माग गरेका थिए ।

गोरखाहरुको भनाइपछि आफ्नो कुरा राख्दै प्रधानमन्त्री ओलीले आफ्ना बेलायती समकक्षीसित गोरखाहरुको समस्या उठाउने आश्वासन दिनु भएको थियो । उहांले गोरखा भर्ती नेपाल–भारत–बेलायतबीचको त्रिपक्षीय सम्झौताको आधारमा हुँदै आएकोमा अब नेपाल र बेलायतबीच द्विपक्षीय सम्झौताबाट गोरखा भर्ती हुनुपर्ने धारणा राख्नु भएको थियो ।

प्रधानमन्त्रीसितको भेटपछि गोरखाहरु सकारात्मक देखिएका छन् ।

प्रतिक्रिया

सम्बन्धित सामाग्री