पहिलो भिसी विजेता गोर्खा सैनिकको नाममा लन्डनमा भवन

लण्डन । पूर्व ब्रिटिश सैनिकहरुलाई सहुलियतमा आवास उपलब्ध गराउने च्यारिटी हेग होम ट्रष्टले भिक्टोरिया क्रस प्राप्त गर्ने प्रथम गोरखा सैनिकको नाममा भवनको नामकरण गरेको छ ।

दक्षिणी लण्डनको मोर्डनमा हेग होमले बनाइरहेको ७० वटा घरहरुमध्ये सर्वप्रथम निर्माण सम्पन्न भएको ६ वटा फ्लाट रहेको भवनलाई भिसी कुलवीर थापा हाउस नामकरण गरिएको छ । सो भवनको यही शनिबार उद्घाटन गरिएको छ । उद्घाटन कार्यक्रममा हेग होम, आम्र्ड फोर्सेस च्यारिटी साफा, ब्रिगेड अफ गोर्खाज, गोरखा वेलफेयर ट्रष्ट, स्थानीय काउन्सिलर, स्थानीय नेपाली गोरखा कम्युनिटीका प्रतिनिधिहरुको उपस्थिति रहेको थियो ।

मोर्डनस्थित ग्रीन लेनमा बनेको सो घरमा नेपाली र अंग्रेजीमा भिसी कुलवीर थापा हाउस लेखिएको छ । यसैगरी घरको भित्तामा भिसी कुलवीर थापाको जीवनी नेपाली र अंग्रेजीमा तयार गरी फ्रेममा सजाइएको छ ।

हेग होम ट्रष्ट र भेट्रान्स अकोमोडेसन फण्डले सो घर निर्माण गरेको हो । बाँकी ६ वटा भवन आगामी अक्टोवरमा सम्पन्न हुने बताइएको छ । जसमध्ये दुई वटा भवनको नाम पूर्व स्थानीय काउन्सिलर म्याक्सी मार्टिनको स्मृतिमा राखिएको छ भने अन्य भवनको नाम पूर्व सैनिकहरुको नममा छ ।

स्थानीय साउथ लण्डन नेपलिज गोरखा एसोसिएसन (सांग्ला) का अध्यक्ष शेर पुनले प्रथम भिसी विजेता गोरखाका नाममा हेग होमले भवन बनाउनु गोरखाहरुको लागि गौरवको कुरा भएको बताए । यस कार्यबाट गोरखाहरु शरणार्थी होइनन् बरु उनीहरुले यो देशका लागि रगत लगानी गरेका छन् भन्ने रेकर्ड भएको उनको भनाइ छ । कार्यक्रममा स्थानीय नेपाली भूतपूर्व सैनिक समुदायले नेपाली नृत्य र खाना उपलब्ध गराएको थियो ।

पाल्पाका कुलवीर थापाले पहिलो विश्वयुद्धमा सन् १९१५ मा भिक्टोरिया क्रस पाएका थिए ।

प्रतिक्रिया

सम्बन्धित सामाग्री