बिहीबार, मंसिर ५ २०७६ | Thu, November 21, 2019
नेपालको समय: ०६:५० | UK Time: 01:05

ओलम्पियन विष्टसहित चार प्रशिक्षक लन्डनमा

विनेपाली
२०७६ भदौ १५ गते १५:१७

लन्डन । नेपालका ओलम्पियन दीपक विष्टसहित चार प्रशिक्षक तालिमका लागि शनिबार लन्डन आइपुगेका छन् । युके स्पोर्टस् र ग्रेट ब्रिटेन तेक्वान्दो एसोसिएसन तथा नेपाल तेक्वान्दो संघबीच दुई वर्षअघि भएको सम्झौता अनुसार चार प्रशिक्षक प्रशिक्षणका लागि बेलायत आएका हुन् ।

हिथ्रो टर्मिनल ४ मा उनीहरुलाई ग्रेट ब्रिटेन तेक्वान्दो एसोसिएसनका सिइओ म्याट एकबल्ड, नेपाली राष्ट्रिय तथा अन्तर्राष्ट्रिय खेलाडी संघ बेलायतका अध्यक्ष सिद्धार्थविक्रम क्षेत्री लगातले स्वागत गरेका थिए ।

सेप्टेम्बर १ देखि १० सम्म म्यानचेस्टरमा हुने प्रशिक्षणमा विष्टसहित त्रिभुवन आर्मी क्लबका दानबहादुर ऐरी, नेपाल पुलिस क्लबका रन्जन श्रेष्ठ र प्रशिक्षक कविराज खड्गीले नेपालको प्रतिनिधित्व गर्ने बताइएको छ ।

बेलायत उड्नुअघि उनीहरुलाई नेपाल तेक्वान्दो संघका अध्यक्ष प्रकाशशम्सेर राणा, महासचिव दीपकराज गुरुङलगायत संघका अन्य पदाधिकारीले विदाई गरेका थिए । प्रशिक्षण कार्यक्रमकै दौरान अध्यक्ष राणा र महासचिव गुरुङ सेप्टेम्बर ७ मा बेलायत आउने कार्यक्रम छ ।

म्यानचेस्टरको प्रशिक्षण समापनपछि नेपाली राष्ट्रिय तथा अन्तर्राष्ट्रिय खेलाडी संघले लन्डनमा उनीहरुको सम्मान तथा अन्तरक्रिया गर्ने क्षेत्रीले बताए ।

युके स्पोर्ट्स र ग्रेट ब्रिटेनका प्रशिक्षकले यसअघि तीन पटक नेपाल गएर खेलाडी र प्रशिक्षकका लागि अलग अलग प्रशिक्षण दिएका थिए ।

प्रतिक्रिया

सम्बन्धित सामाग्री

फेसबुक