मंगलबार, मंसिर २४ २०७६ | Tue, December 10, 2019
नेपालको समय: ०५:१५ | UK Time: 23:30

एनआरएन युकेको डेलिगेट्सबाट नाम हटाइएको विरुद्ध उजुरी

विनेपाली
२०७६ मंसिर ६ गते १३:४१

लन्डन- एनआरएन युकेका एक पंजीकृत सदस्यले आफ्नो नाम केन्द्रमा पठाइएको मतदाता नामावलीबाट हटाइएको भन्दै उजुरी गरेका छन् ।

रेडिङमा बसोबास गर्ने बालकृष्ण दाहाल दशैं लगत्तै महँगो हवाई टिकट किनेर काठमाडौँ पुगेका थिए । गैर आवासीय नेपाली संघको नवौं विश्व सम्मेलनमा भाग लिनका लागि एनआरएन युकेद्वारा प्रकाशित प्रतिनिधि सूचीमा उनको नाम  २२१ नम्बरमा थियो । तर, काठमाडौँमा एनआरएन केन्द्रिय सचिवालयद्वारा प्रकाशित अन्तिम मतदाता नामावलीमा उनको नाम थिएन ।

यस विषयमा छानबिन गरियोस् भन्ने माग गर्दै दाहालले एनआरएनए युकेकी अध्यक्ष पुनम गुरुङ समक्ष लिखित उजुरी दिएका छन् । आफ्नो निवेदनमा उनले भनेका छन्, “मैले केन्द्रिय सचिवालयमा बुझ्दा एनआरएन युकेका जिम्मेवार पदाधिकारीले नै पटक पटक नामावली परिवर्तन गरेको बताइयो । मैले केन्द्रिय निर्वाचन समिति समक्ष पनि लिखित उजुरी बुझाएको छु । एनआरएन युकेले सार्वजनिक रुपमा प्रकाशित गरेको डेलिगेट सूचीमा केन्द्रमा कसैलाई हराउने वा जिताउने निहित उद्देश्य राखेर म जस्ता कैयौं डेलिगेटहरुको नाम पटक-पटक काट्ने अधिकार ति पदाधिकारीलाई कसले दियो ? एक वर्ष वा त्यो भन्दा अघि बेलायत छोडेर नेपाल फर्की सकेका व्यक्तिको नाम मतदाता नामावलीमा कसले घुसायो ? यस्ता अनियमतिताबारे एउटा उच्चस्तरीय समिति गठन गर्न र समितिको प्रतिवेदन नआउंदासम्म सम्वन्धित पदाधिकारीलाई निलम्वन गर्न माग गर्दछु ।”

यस्ता क्रियाकलापले सामाजिक संस्थाको रुपमा रहेको एनआरएनएको छबि धमिलो भएको पनि उनले उल्लेख गरेका छन् ।

दाहाल जस्तै युकेमा सूचीमा नाम रहेकी नेपलिज नर्सिङ एसोसियसन युकेकी पूर्व अध्यक्ष सुशीला कार्कीको नाम काठमाडौँमा हटाइएको थियो भने अर्की पूर्व अध्यक्ष अजित सिम्खडाको नाम युकेको सूचीमै समावेश गरिएको थिएन ।

एनआरएन युकेद्वारा प्रकाशित प्रतिनिधि सूचीमा पटक-पटक नाम फेरबदल गरिएकोबारे एनआरएन युकेका नवनिर्वाचित उपाध्यक्षद्वय प्रेम गाहामगर तथा नारायणदत्त कंडेलले सम्वन्धित पदाधिकारीको नामै उल्लेख गरि केन्द्रिय कार्यालयमा उजुरी दर्ता गराएका थिए । तर, कुनै सुनुवाई भएन।

यसरी युकेदेखि नै ‘सेटिङ’ गरी केन्द्रको चुनाव प्रभावित गर्ने काम एनआरएन जस्तो सामाजिक संस्थालाई नसुहाउने एनआरएनए अगुवाहरुले जनाएका छन् । एनआरएनएको चुनावलाई पारदर्शी र विश्वसनीय नबनाउंदासम्म निर्वाचित पदाधिकारीहरुको वैधतामाथि प्रश्न उठिनै रहने उनीहरुको भनाइ छ ।

एनआरएन युकेका नवनिर्वाचित उपाध्यक्षद्वय प्रेम गाहामगर तथा नारायणदत्त कंडेलले केन्द्रिय कार्यालयमा दर्ता गराएको उजुरी-

प्रतिक्रिया

सम्बन्धित सामाग्री

फेसबुक