म्याग्दी । जिल्लाको बेगखोला गाविसमा रहेको महादेव माविमा युकेमा रहेका बेगखोलावासीले पाँच लाख रुपियाँ राशिको पुरस्कार अक्षयकोष स्थापना गरेका छन् ।
सो विद्यालयबाट प्रत्येक वर्ष एसएलसी उत्तीर्ण गर्ने विद्यार्थीलाई पुरस्कृत गर्नका लागि बेगखोला कल्याणकारी समाज उप–शाखा युकेमा आवद्ध व्यक्तिले आर्थिक सङ्कलन गरी विद्यालयको नाममा अक्षयकोष स्थापना गरेका हुन् ।
अक्षयकोषबाट प्रत्येक वर्ष एसएलसी उत्तीर्ण हुने विद्यार्थीलाई जनही दुई हजार रुपियाँका दरले पुरस्कृत गर्ने बेगखोला गाविस सचिव चित्रनाथ शर्माले जानकारी दिए । विद्यालयमा आयोजित कार्यक्रममा सो अक्षयकोषको घोषणा गरिएको हो ।
विद्यालय व्यवस्थापन समितिका अध्यक्ष केबहादुर पुनको अध्यक्षतामा भएको कार्यक्रममा बेगखोला कल्याणकारी समाज उपशाखा युकेका युबहादुर गर्बुजाले अक्षयकोषबाट प्रदान हुने पुरस्कारले विद्यार्थीलाई पढाइप्रति उत्प्रेरित गर्ने बताए ।
उपशाखा युकेमा आवद्ध समाजसेवीले २०६२ सालदेखि नै विद्यालयबाट एसएलसी उत्तीर्ण गर्ने विद्यार्थीलाई जनही दुई हजार रुपियाँका दरले पुरस्कृत गर्दै आएको विद्यालयले जनाएको छ ।
यसैबीच बेगखोला कल्याणकारी समाज उपशाखा युकेका पदाधिकारीले मिर्गाैला पीडित गणेश तिलिजालाई ७८ हजार रुपियाँ र सडक दुर्घटनामा घाइते भएकी दीपा शेर्वुजाको उपचारार्थ ४२ हजार रुपियाँ नगद सहयोग प्रदान गरेको छ ।
त्यस्तै उपशाखा युकेका युबहादुर गर्वुजाले स्थानीय पार्वती, बेगखोला र पुनभिसी युवा क्लबलाई १५ हजार रुपियाँ, बाजा समूहलाई तीन हजार रुपियाँ सहयोग गरेको गाविस सचिव शर्माले जानकारी दिए ।
