लन्डन । आवासीय अधिकारले बेलायत यात्रा त तय गर्यो तर यहां अभावै अभाव । छर छिमेकसंग बोलौं चिनजान छैन्, चिनेपनि अंग्रेजी बोल्न मुश्किल छ । साथमा सन्तान छैनन् र भएकाको पनि बेलायती व्यस्त जीवनले भेटघाट विरलै छ । जाऊं कतै चिनेजस्तो लाग्दैन् ।
बिरानो देशमा यस्तै वातावरणले विरक्तिएका भूपू गोर्खा वृद्धवृद्धाहरुलाई अब केही हदसम्म राहत मिल्ने भएको छ । उनीहरु अब कतै भेला भएर आफ्ना दुःख सुःख बिसाउन सक्नेछन् आफ्नै उमेर समूहका नम्बरीसंग, दौंतरीसंग वा गाउंलेसंग ।
हङ्स्लो काउन्सिल, एज यूके हङ्स्लो, गोर्खा सेटलमेन्ट सर्भिस् र गेसो हङ्स्लो शाखाको संयुक्त पहलमा प्रत्येक मंगलबार भूपू गोर्खा वृद्धवृद्धाहरुका लागि नियमित सामाजिक भेला गर्ने तयारी अन्तिम चरणमा छ ।
आगामी २६ अगष्ट मंगलबारदेखि मोन्टेगू हल हङ्स्लोमा इच्छुक वृद्धवृद्धा आएर गफ गर्न सक्नेछन्, अंग्रेजी र कम्प्युटर सिक्न अनि योगा कक्षा लिन सक्नेछन् । जिपी वा अन्य समस्या भोगिरहेको भए त्यो सम्वन्धित निकायसम्म लगिदिने काम पनि स्वयंसेवकहरुमार्फत हुनेछ । मन हुनेहरुलाई नाच्न, गाउन पनि छुट छ । चियापानी र हल्का खाजा सित्तैमा उपलव्ध हुनेछ । समय भने हाललाई १२ देखि १ बजेसम्म राखिएको कार्यक्रम संयोजक धर्म तामाङले वीनेपालीलाई जनाए । गैर गोर्खाहरुका लागि पनि प्रवेश खुल्ला भएको तामाङले उल्लेख गरे । एक्लो र बिरानो महशुस गरिरहेका वृद्धवृद्धाको मन भुलाउन र उनीहरुका समस्या समाधान गर्न भेलाले प्राथमिकता दिने अपेक्षा छ । हङ्स्लो, फेल्थाम, हेज र ग्रीनफोर्डसम्मका वृद्धवृद्धा साप्ताहिक जमघटमा जान सक्ने जनाइएको छ ।
उक्त जमघटमा सहभागी हुन वा स्वयंसेवक बन्न इच्छुकलाई अवसर भएको जनाउंदै तामाङले ०७७२३०६३९६१ मा सम्पर्क गर्न भनेका छन् । त्यस्ता स्वयंसेवीहरुलाई सातादिनको प्रशिक्षण समेत दिइनेछ ।
