टेकवीर मुखियालाई सम्मान, भूपाल राईलाई पुरस्कार

लण्डन । यसवर्षको प्रतिभा सम्मान कलाकार टेकवीर मुखियालाई र प्रतिभा पुरस्कार साहित्यकार भूपाल राईलाई दिइने भएको छ ।
नेपाली प्रतिभा प्रतिष्ठान, बेलायतको यहाँ हालै बसेको बैठकले मुखिया र राईलाई सम्मानित र पुरस्कृत निर्णय गरेको प्रतिष्ठानका कोषाध्यक्ष देवेन्द्र खेरेसले जानकारी दिए ।
साझा प्रकाशनसँग लामो समय आवद्ध रहेका कलाकार मुखिया करिब पाँच दशकभन्दा लामो समयदेखि नेपाली कला क्षेत्रमा सक्रिय छन् भने राई कविता र गीत लेखनमा लामो समयदेखि सक्रिय छन् ।
सम्मान पाउनेले २० हजार १ रुपियाँ राशीको साथमा सम्मानपत्र पाउँछन् भने पुरस्कार पाउनेले १ लाख १ रुपियाँ राशी पाउने गर्छन् ।
सम्मान र पुरस्कार सन् २०१५ को जनवरीमा काठमाडौँमा एक कार्यक्रमको आयोजना गरी वितरण गरिने कार्यक्रम राखिएको प्रतिष्ठानले जनाएको छ ।
सन् २००८ देखि प्रदान गर्न थालिएको प्रतिभा सम्मान हालसम्ममा बेलायतका साहित्यकार स्वर्गीय ईश्वर मानन्धर, साहित्यकार जीवी लुगुन, गायक भक्तराज आचार्य, समालोचक प्रा.डा. गोविन्दराज भट्टराई र गजलकार बुँद रानाले पाइसकेका छन् भने प्रतिभा पुरस्कार साहित्यकार नविन विभास, गायक कुबेर राई, कवि उपेन्द्र सुब्बा, कवि श्रवण मुकारुङ, कवि मोमिला र साहित्यकार राजकुमार दिक्पालले पाइसकेका छन् ।
शुरुमा सम्मानको राशी १० हजार र पुरस्कारको राशी २५ हजार रुपियाँ रहेकोमा सन् २०१० देखि बढाएर २० हजार एक र १ लाख एक रुपियाँ पुर्‍याइएको हो ।
नेपाली कला, संगीत र साहित्यका क्षेत्रमा योगदान दिने पुराना सर्जकलाई प्रतिभा सम्मान र नयाँ सर्जकलाई प्रतिभा पुरस्कार दिइने गरिन्छ ।
युकेमा समान्य जीविकोपार्जन गर्दै आएका साहित्यनुरागीहरुले प्रवासमा रहेर पनि नेपाली कला, संगीत र साहित्यका क्षेत्रमा लाग्ने नयाँ पुराना प्रतिभालाई सम्मान र प्रोत्साहन गर्न सो सम्मान र पुरस्कार स्थापना गरेका हुन् ।
प्रतिष्ठानले यसै वर्षदेखि पुरस्कार र सम्मानका लागि मापदण्ड पनि हेरफेर गरेको छ । परिवर्तित व्यवस्थाअनुसार सम्मान ५० वर्ष उमेर कटेको सर्जकलाई र पुरस्कार ५० वर्ष मुनीको सर्जकलाई दिने व्यवस्था गरेको छ । एउटै क्षेत्र, एउटै जातिका सर्जकलाई वर्षेनी पुरस्कृत नगर्ने, उच्चपदस्थ सरकारी कर्मचारी र यसअघि ठूला पुरस्कार पाइसकेकालाई पुरस्कार र सम्मान नदिने आर्थिक अवस्था कमजोर भएका सर्जकलाई सम्मान र पुरस्कृत गर्दा प्राथमिकता दिने लगायतका व्यवस्था परिमार्जित मापदण्डमा छन् ।