काठमाडौं। पर्यटन प्रवर्द्धन गर्न नेपाल र भारतका विभिन्न सहरहरुबीच बस सेवा सञ्चालन गरिने भएको छ। काठमाडौमा हुने सार्क शिखर सम्मेलनको समयमा बस सेवा सञ्चालनको सम्झौतामा हस्ताक्षर हुने भएको छ। काठमाडौं- दिल्ली, पोखरा-दिल्ली र काठमाडौ-वारणसीबीच दैनिक रुपमा बस सेवा सञ्चालनमा ल्याउन सकिने रुटको रुपमा दुवै देशका अधिकारीहरुले पहिचान गरेको टाइम्स अफ इन्डियाले जनाएको छ।
सार्क सम्मेलनका क्रममा भारतीय प्रधानमन्त्री नरेन्द्र मोदीको उपस्थितिमा बस सेवा सञ्चालन सम्बन्धी सम्झौतामा हस्ताक्षर हुने भारतीय अधिकारीहरुले विश्वास व्यक्त गरेका छन्। यस्तो सबैभन्दा लामो रुढ दिल्ली-काठमाडौको १ हजार ५८ किलोमिटरको हुनेछ। बस सेवा सञ्चालनले दुवै देशको पर्यटन प्रवर्द्धनमा सहयोग पुग्ने अपेक्षा गरिएको छ।
मोदीको भ्रमण अघि नै नेपाल आउने भारतीय यातायात मन्त्री नीतिन गडकरीको भ्रमण समयमा नेपाल र भारतको सडक मर्मत सम्बन्धमा छलफल हुने बताएका छन्।
