काठमाडौं। दक्षिण एशियाली क्षेत्रीय सहयोग संगठन (सार्क) सम्मेलनका लागि पाँच दिन दिउँसो एक मात्रै अन्तर्राष्ट्रिय विमानस्थल बन्द गर्ने भएको स्थानीय सञ्चार माध्यमहरुले जनाएका छन्।
न्युजपोर्टल पहिलो पोस्टले मंसिर ८ देखि १२ गतेसम्म बिहान ९ बजेदेखि साँझ ५ बजेसम्म विमानस्थल बन्द रहने विमानस्थलका उच्च अधिकारीलाई उद्धृत गर्दै जनाएको छ । दिउँसोको उडान तथा अवतरणलाई बिहान र साँझका लागि व्यवस्था मिलाइएको अधिकारीहरुले जनाएका छन्। 
शिखर सम्मेलन मंसिर १० र ११ गते राष्ट्रिय सभागृहमा हुनेछ । यसअघि नै सरकारले मंसिर ८ गतेदेखि १२ गतेसम्म जोर दिन जोर नम्बरको गाडी र बिजोर दिन बिजोर नम्बरको गाडी सञ्चालनमा ल्याउने निर्णय गरिसकेको छ ।
गृह मन्त्रालयले सार्क शिखर सम्मेलनका क्रममा काठमाडौँ उपत्यकामा पाँच दिन विद्यालय, क्याम्पस बन्द हुनेछ भने दुई दिन सार्वजनिक विदा हुनेछ । गृह मन्त्रालयका अनुसार मंसिर ९ देखि १२ गतेसम्म शिक्षण संस्था बन्द हुनेछन्।
त्यसैगरी मंसिर १० र ११ गते दुई दिन सार्वजनिक विदा हुनेछ । सरकारले दक्षिण एसियाली क्षेत्रीय सहयोग सङ्गठन (सार्क) को १८ औं शिखर सम्मेलनको तयारीका सम्बन्धमा जानकारी लिन प्रधानमन्त्री तथा मन्त्रिपरिषद् कार्यालयका सचिवको नेतृत्वमा द्रूत कार्यदल गठन गरेको छ ।
सार्कलाई केन्द्रित गरेर निर्माण अगाडि बढाइएका भौतिक पूर्वाधारको काम प्रभावकारी नभएको भन्ने सर्वत्र गुनासो आइरहेको बेला सरकारले उक्त कार्यदल गठन गरेको हो । सरकारले सार्क सम्मेलन तयारीका लागि २ अर्ब रुपैया खर्च गरेको छ।
