सप्तरी, ३२ साउन । विभिन्न राजनीतिक दलले आह्वान गरेको आमहडतालको दोस्रो दिन आज बिहानैदेखि सप्तरीको जनजीवन प्रभावित भएको छ ।
सङ्घीय समाजवादी फोरम नेपाल, सद्भावना पार्टी, तराई मधेस लोकतान्त्रिक पार्टी र नेकपा–माओवादीसहितका पार्टीले आह्वान गरेको तराई मधेस बन्दका कारण सदरमुकाम राजविराजबाट लामो तथा छोटो दूरीका सवारी साधन छुटेका छैनन् । यहाँ कलकारखाना, उद्योगधन्दा, बजार, शिक्षण संस्थासमेत ठप्प छ ।
बन्दकर्ताहरुले बिहानैदेखि पूर्वपश्चिम राजमार्गको भारदह, कञ्चनपुर, रुपनी, कल्यानपुरलगातका ठाउँमा बन्द गराउँदै हिँडेका छन् ।
यसैबीच, जिल्लाभित्र कुनै किसिमको अप्रिय घटना हुन नदिन ठाउँ ठाउँमा नेपाल प्रहरी र सशत्र प्रहरी परिचालन गरिएको जिल्ला प्रहरी कार्यालय सप्तरीले जनाएको छ ।
