बेलायतले थप शरणार्थीलाई प्रवेश दिने

लन्डन ।  बेलायती प्रधानमन्त्री डेभिड कयामरुनले आफ्नो पोर्चुगल भ्रमणको सिलसिलामा बेलायतले मानवीय सङ्कटलाई मध्यनजर राख्दै हजारौँ अरू सिरियाली शरणार्थीलाई आफ्नो देशमा प्रवेश दिने कुरा व्यक्त गरेका छन् ।

सङ्कटको बेला सहयोग गर्नु आफ्नो देशको नैतिक जिम्मेवारी हुने उनले बताए ।

प्रधानमन्त्री डेभिड कयामरुनले बेलायत युरोपियन युनियनको शरणार्थी पुनः वितरण योजनामा सहभागी नभई संयुक्त राष्ट्रसङ्घको मध्यपूर्वमा अवस्थित शिविरबाट सिधै शरणाथीलाई आफ्नो देशमा लग्ने बताए । सिरियाली शरणार्थीलाई बेलायतले जस्तो कुनै पनि युरोपेली राष्ट्रले सहयोग नगरेको कयामरुनले पोर्चुगलका समकक्षी पेड्रो पासोस कोएल्होसँग गरेको पत्रकार सम्मेलनका क्रममा बताए ।

उनले भने, “बेलायतले अहिलेसम्म ५ हजार शरणार्थीलाई शरण दिइसकेको र हामी अझै सङ्कटमा परेका हजारौँलाई सहयोग गर्न तयार छौँ । यो हाम्रो मानवीय कर्तव्य हो ।”