ब्लु वाटर सपिङ सेन्टरमा शंकास्पद वस्तु भेटिएपछि खाली गराइयो

 

लन्डन । शंकास्पद वस्तु भेटिएपछि ब्रिटेनकै ठूलो ब्लु वाटर सपिङ सेन्टर खाली गराइएको छ । उक्त शंकास्पद वस्तुलाई शनिवार सांझ बम डिस्पोजल वीज्ञहरुले विस्फोट गराएपछि अप्रिय घट्ना चाहिं हुन पाएन । सपिङ सेन्टरले आफ्नो ट्वीटरमा प्रहरीले अनुसन्धान गरिरहंदा सपिङ क्षेत्र वरपर घेरा हालेर नियन्त्रणमा लिएको जनाएको छ ।

केन्ट प्रहरीले धेरै पसल खाली गराइएको जनाउंदै थप अनुसन्धान भइरहेको जनाएको छ ।

ब्रिटेनसहित समस्त युरोप नै यतिखेर आतंकवादको त्रासदीमा छ । बेलायती प्रधानमन्त्री डेभिड क्यामरुनले पेरिस आक्रमण लगत्तै ब्रिटेन पनि आतंकवादको निसानामा रहेको बताएका थिए । बेलायत पनि अहिले उच्च सुरक्षा सतर्कतामा छ ।

शनिवारमात्र बेल्जियम राजधानी ब्रसेल्स् मा आइएसले पेरिसकै जस्तो आक्रमण गर्ने योजना बनाएको त्यहांको जासुस संस्थाले पत्ता लगाएपछि सुरक्षा सतर्कता सबैभन्दा उच्च लेभल ४ मा राखिएको छ । त्यहांको मेट्रो रेल सेवा र धेरै पसल बन्द गरिएका छन् ।