संविधानको प्रचार अभियान सुरु

भक्तपुर, ३ पुस । आजदेखि संविधानको प्रचार अभियान सुरु भएको छ ।

भक्तपुर नगरपालिकाले आफ्ना नगरभित्रका जनतालाई संविधानबारे जानकारी दिन दरबार स्क्वायरमा ‘नेपालको संविधान जनताको संविधान, जनताको संविधान जनताकै माझमा’ नाराका साथ राष्ट्रव्यापी प्रचार कार्यक्रम सुरु भएको हो ।

कार्यक्रममा नेपाल मजदुर किसान पार्टीका अध्यक्ष एवम् सांसद नारायणमान बिजुक्छेले संविधानले महिला, मधेसी, मुसलमान, आदिवासी, जनजाति, दलित सबैको अधिकार स्थापित गरेकाले अहिल्यै संशोधन गर्न हतारिन नहुने बताउनुभयो ।
भूमिसुधार तथा व्यवस्था सहायकमन्त्री दिनेश श्रेष्ठले संविधानको प्रचार कार्यक्रममा नगरपालिकाले जिल्लाका अन्य सभासद्, स्थानीय निकायका प्रतिनिधि, प्रजिअ र स्थानीय विकास अधिकारीलाई नबोलाउनु गलत भएको बताउनुभयो ।

सांसद प्रेम सुवाल र अनुराधा थापा मगर लगायतले संविधानका कतिपय बुँदामा आफ्नो दलको फरक मत रहे पनि देश जनताको हितका लागि संविधान र वर्तमान सरकारलाई सहयोग गरेको बताउनुभयो ।