लन्डनका नेपाली किशोर किशोरी सामाजिक कार्यमा सरिक बन्दै

 

लन्डन । लन्डनमा नयाँ पुस्ताका नेपाली किशोर किशोरीलाई नेपाली समुदायसंग जोड्दै उनीहरुलाई सामाजिक कार्यमा सरिक बनाउने उद्देश्य सहित नेप्लिज यूथ नेटवर्क यूके गठन गरिएको छ । सोसाइटी अफ नेप्लिज हाइली स्किल्ड प्रोफेशनल्स यूकेको प्रायोजन र संयोजन सहयोगमा उक्त युथ संगठन गठन गरिएको हो । अविभावकहरु पृष्ठभूमिमा बसेर जवान किशोर किशोरीहरु आफैले संचालन गरेको वुल्विच लोटस क्लबको उक्त कार्यक्रममा हाइली स्किल्ड नेप्लिजका अध्यक्ष नारायण भट्टराईले यूथ नेटवर्कको औपचारिक उद्घाटन गरे ।

बेलायतमा प्राय नेपाली संघ संस्थाहरुले आयोजना गर्ने कार्यक्रममा खादा, माला, आसन र भाषणले नै समय खाने गर्दछ । तर नयाँ पुस्ताका नेपाली युवा युवतीहरुले आयोजना र संचालन गरेको यो कार्यक्रम भने फरक थियो । किशोर किशोरीहरुकै अग्रसरता र सक्रियतामा सम्पन्न उक्त कार्यक्रममा उनीहरुले निकै गहकिलो प्रस्तुति दिए । स्टेजमा नभएर फ्लोरमै आपसी अन्तरक्रियामा रमाउदै गर्दा संचालक शैलेश घिमिरे र प्रियंका रेग्मी स्टेजमा उत्रेर माईक समाए । कार्यक्रम आयोजना गर्न सघाउने अभिवाकहरुलाई हार्दिक धन्यवाद व्यक्त गरे, आफ्ना अविभावकहरुले देखाएको बाटोमा हिड्ने प्रण गरे । उनीहरुले नेपालप्रतिको अथाह माया र नेपाली संस्कृति र सामाजिक मूल्य मान्यताहरु आफूहरुलाई सधै मार्गदर्शक हुने बताए । नेपाली रास्ट्रिय गान बजाएर हैन गाएरै सुनाए । बेलायतको राष्ट्रिय गान पनि उनीहरुले बजाए । नेपाली भेष भुषामा सजिएका नृत्यहरु प्रदर्शन गरे । क्विज राउण्डमा नेपालको पहिलो प्रधानमन्त्री देखि बेलायतको राज परिवारसम्मका प्रश्नहरु सोधे । आफ्नो उमेर समूहको सहभागितामा खानपान गरे, गीत गाए, नाचे र रमाए । नेपाली समुदाय, संघ संस्थाहरुसंग सहकार्य गर्दै अगाडि बढ्ने, भाइचारा विकास गर्ने, परोपकारी कार्यक्रम गर्ने जस्ता भावी कार्ययोजनाहरु पनि सुनाए ।

कार्यक्रममा स्कुल देखि युनिभर्सिटी सकाएका अधवैसेहरुको उपस्थिति थियो । कार्यक्रममा उनीहरुले एक आपसमा परिचय गर्नको लागि टिम बिल्डिंग बिंगो चलाएका थिए । खेल, शिक्षा, संगीत लगायतका मनोरन्जनलाई उनीहरुले भरपुर बनाएका थिए । आफूहरुबाटै ठूलाले सानालाई धेरै सिकाए । समग्र रुपमा यूकेमा हुर्केर बसेका नेपाली युवा युवतीहरुको समन्वयमा लक्षित उक्त कार्यक्रममा करियर काउन्सिलिंग, एजुकेशनल एड्भाईस जस्ता सेमिनार स्टलहरु समेत उनीहरुले संचालन गरेका थिए । साना उमेर समूहको निम्ति समेत ठूला केटाकेटीहरुले बिभिन्न मनोरंजन दिएका थिए ।

फेश पेन्टिंग, क्यारेम बोर्ड प्रतियोगिता, जिम्न्यास्टिक शो लगायतका क्रियाकलाप पनि उनीहरुले गरेका थिए । अन्त्यमा कार्यक्रमको लिडिंग रोलका शैलेश घिमिरेकै नेतृत्वमा २७ जनाको कोअर्डिनेशन कमिटी घोषणा पश्चात ग्रुप डान्स र डिजेमा रमाउदै कार्यक्रम समापन भएको थियो । कार्यक्रममा झन्डै दुई सयको संख्यामा किशोर किशोरीहरु सहभागी थिए । सोसाइटी अफ नेप्लिज हाइली स्किल्ड प्रोफेशनल्स यूकेका अध्यक्ष नारायण भट्टराईले यूकेका नेपाली नौजवानहरुको निम्ती यस्तो खालको कार्यक्रमको शुरुवात गर्न पाएकोमा खुशी व्यक्त गरे । साथै उनले नेप्लिज युथ नेटवर्कको औपचारिक उद्घाटनको घोषणा भएको बताए । संयोजन सहयोगी शेखर वाग्लेले अब आफ्नै छोराछोरीहरु साथी सरहका बनिसकेको भन्दै अब विदेशमा नेपाल र नेपालीलाई जोडने जिम्मेवारी उनीहरुमा सार्दै जानु पर्ने कुरामा जोड दिए । अभिवावक हरुले पृष्ठभूमिबाट सघाउदै कार्यक्रम संचालन, व्यवस्थापन र समापनमा उनीहरुलाई नै अगाडी सारेका थिए । पृष्ठभूमिबाटै कम्युनिकेशनमा भूमिका खेलेका नेप्लिज हाईली स्किलकै बिष्णु न्यौपानेले अर्को पुस्तामा समेत नेपालीपनको जगेर्ना गर्नुको साथै जेनेरेशन ग्याप घटाउनु कार्यक्रमको प्रमुख उद्देश्य रहेको बताए । नयाँ पुस्ताको कार्यक्रम गर्ने स्टाईल बयस्कहरुले पनि सिक्न सके लन्डनका नेपाली कार्यक्रमहरु रुचिकर र उपलब्धिमुलक हुन सक्ने तर्क कतिपय अविभावकले गरेका थिए ।