चिसिएको सम्बन्ध वार्ताबाट सम्भवः राजदूत उपाध्याय

काठमाडौँ, २४ पुस । भारतका लागि नेपालका राजदूत दीपकुमार उपाध्यायले नेपाल–भारतबीच चिसिएको सम्बन्धलाई सकारात्मक छलफलबाट सुधार गर्नुपर्ने बताउनुभएको छ ।

रिपोर्टर्स क्लब नेपालले आज राजधानीमा आयोजना गरेको साक्षात्कार कार्यक्रममा बोल्दै राजदूत उपाध्यायले भारतले पनि नेपालसँग चिसिएको सम्बन्धलाई सुधार्न चाहेको छ भन्नुभयो ।

उहाँले नेपाल–भारतबीच अहिलेको अवस्थामा सुमधुर सम्बन्धको सम्भावना रहेको यस विषयमा आफू विश्वस्त रहेको बताउनुभयो ।

उहाँले संविधान जारी भएपछि नेपाल नयाँ दिशामा अघि बढ्ने, आर्थिक रुपमा मजबुत हुने विश्वास लिएको बताउँदैँ अहिलेको असहज वातावरणले जनतामा निराशा उत्पन्न गराएको उल्लेख गर्नुभयो ।

नेपाल–भारत बिपी फाउण्डेसनको बैठकमा सहभागी हुन नेपाल आउनुभएका राजदूत उपाध्यायले आफूले भारतका प्रधानमन्त्रीदेखि सबै नेतालाई भेटेर निर्दोष नेपाली जनताले अनाहकमा दुःख पाएकाले नाकाबन्दी नगर्न आग्रह गरेको बताउनुभयो ।

उहाँले भन्नुभयो—‘मैले भारतीय नेतालाई निर्दोष जनताले दुःख पाएको अवस्थाबारे अवगत गराएको छु । उनीहरु पनि समस्या समाधान गर्न सकारात्मक देखिएका छन् ।’ ‘नेपाल–भारतबीचको सम्बन्ध तातो पिँडालुको जस्तो हो । दुबै देशले एक–अर्कालाई हानी पु¥याएर केही गर्न सक्दैन । त्यसैले सकारात्मक वार्ताबाटै अघि बढ्नुपर्छ’ उहाँले भन्नुभयो ।

भूकम्पको पीडा सकिन नपाउदैँ त्यो भन्दा ठूलो समस्या तराईको आन्दोलन र भारतीय नाकाबन्दीले पारेको उल्लेख गर्दै राजदूत उपाध्यायले अहिलेको खराब दिनको चाँडै अन्त्य हुने विश्वास व्यक्त गनुभयो ।

सबैको सहमतिको आधारमा सविधान सशोधन गर्नुपर्नेमा जोड दिँदँै उहाँले आन्दोलनरत मधेसी दललाई वार्ताका माध्यमबाट अगाडि बढ्न आग्रह गर्नुभयो ।

उहाँले वीरगन्ज नाका कहिले खुल्छ भनी पत्रकारको प्रश्नमा जहिलेदेखि नाकामा आन्दोलन गर्ने कार्य रोकिन्छ त्यही दिनबाट नाका सुचारु हुने भारतीय पक्षको भनाइ रहेको स्पष्ट पार्नुभयो ।

फरक प्रशङ्गमा बोल्दै राजदूत उपाध्यायले बिपी कोइराला सानो देशका ठूलो नेता भएको र उहाँले देखाउनुभएको बाटोमा मुलुक हिंड्न नसकेको बताउनुभयो ।