प्रमुख दल र मधेसी मोर्चा सहमति नजिक

काठमाडौँ, ३ माघ । प्रमुख तीन राजनीतिक दल र तराई मधेसमा आन्दोलनरत संयुक्त लोकतान्त्रिक मधेसी मोर्चाबीच एकाध विषयमा बाहेक अरु विषयमा सहमति भएको छ ।

सिंहदरबारमा आज बसेको कार्यदलको बैठकमा मधेसी मोर्चा राजनीतिक समितिमार्फत प्रदेशको सीमा निर्धारणलगायतका विषयमा सहमत हुन तयार भएको हो ।

बैठकपछि नेताहरुले सहमतिको एकदमै नजिक रहेको प्रतिक्रिया दिँदै आ–आफ्नो पार्टी र शीर्ष नेतासँग थप संवाद गरेर सोमबार नै सबै विषयलाई टुङ्गो लगाइने बताउनुभयो ।

मोर्चाका तर्फबाट पेस भएका ११ बुँदामा नै सहमतिको नजिक पुगेको जानकारी दिँदै उहाँहरुले भोलि साँझसम्म सकारात्मक निष्कर्षमा पुगिने उल्लेख गर्नुभयो ।

प्रमुख राजनीतिक दलले सीमाङ्कनको विषयमा उच्चस्तरीय समितिमार्फत तीन महिनाभित्र विवाद समाधान गर्ने प्रस्ताव राख्दै आएका थिए । सो समितिको कार्यादेशका विषयमा भने विवाद रहँदै आएको थियो । आजको वार्तापछि कार्यादेशको विषयमा समेत सहमति भएको बताइएको छ । तर सहमति कसरी र कुन आधारमा भयो भन्नेमा भने नेताहरुले प्रतिक्रिया दिनुभएको छैन ।

नेपाली काँग्रेसका नेता एवम् कार्यदल सदस्य महेश आचार्यले मोर्चाका तर्फबाट समिति गठन र त्यसको कार्यादेशको विषयमा शनिबारको बैठकमा उठाइएको विषयमा छलफल भएको बताउनुभयो । सहमति हुने आधार एकपछि अर्को गर्दै तयार भएको उल्लेख गर्दै उहाँले त्यसलाई कसरी मूर्तिकृत गर्ने भन्ने विषयमात्रै बाँकी रहेको स्पष्ट पार्नुभयो ।

राजनीतिक समिति र त्यसको कार्यादेश सबैलाई मान्ने हुनेगरी बनाउने भन्नेमा विभिन्न विकल्पमा विचार राख्ने काम भएको भन्दै उहाँले एकाध विषयबाहेक अरु सबै मुद्दामा सहमतिको नजिक पुगेको बताउनुभयो ।

नेता आचार्यले एकअर्काको धारणा र भनाइलाई अभिलेखीकरण गरिएको र साझा धारणा बनाउने प्रयत्न भइरहेको र सोमबारसम्म केही न केही सहमति हुनसक्ने विश्वास व्यक्त गर्नुभयो ।

एकीकृत नेकपा(माओवादी)का महासचिव कृष्णबहादुर महराले विगतको भन्दा ठोसरुपमा नै वार्तामा प्रगति भएको जानकारी दिनुभयो । उहाँले प्रमुख तीन दलमा छुट्टाछुट्टै र संयुक्त रुपमा छलफल गरेर कार्यदलमा भएको प्रगतिलाई जानकारी गराउने र अन्तिम निष्कर्षमा पुगिने बताउनुभयो ।

“वार्ता एकदमै सकारात्मक भएको छ । व्यवस्थापिका–संसद्को अधिवेशन यही माघ ५ गते बोलाइएको सन्दर्भमा सो अगावै सहमति हुने आधार बनेका छन् । दुवै पक्ष समस्या समाधानप्रति गम्भीर देखिएका छन्”–महासचिव महराले भन्नुभयो ।

तराई मधेस लोकतान्त्रिक पार्टीका सहअध्यक्ष हृदयेश त्रिपाठीले एकदमै सकारात्मक ढङ्गबाट छलफल भएको र सहमतिको नजिक पुगिएको प्रतिक्रिया दिनुभयो । उहाँले पार्टी नेतृत्वसँग छलफल गरेर भोलि पुनः ३ बजे बैठक बस्ने र ठोस खाका तय गरिने बताउनुभयो ।

सद्भावना पार्टीका सहअध्यक्ष लक्ष्मणलाल कर्णले बुँदागत रुपमा नै खुलेर छलफल भएको भन्दै सकारात्मक निकास निस्कने बताउनुभयो । उहाँले भन्नुभयो– “राजनीतिक समितिको अधिकार क्षेत्रको विषय र वैधानिकताको विषयमा लामै छलफल भयो । कार्यदल सहमतिनजिक पुगेको छ । पार्टीगत रुपमा नै छलफल गरेर भोलि टुङ्गो लगाउँछौँ ।”

बैठकमा उपप्रधान एवम् रक्षामन्त्री भीमबहादुर रावल, एमाओवादीका महासचिव महरा, काँग्रेस नेता आचार्य, तराई मधेस लोकतान्त्रिक पार्टीका सहअध्यक्ष त्रिपाठी, सङ्घीय समाजवादी फोरम नेपालका तर्फबाट डा मङ्गलसिद्धि मानन्धर, तराई मधेस सद्भावना पार्टीका नेता रामनरेश राय सहभागी हुनुहुन्थ्यो ।