नयाँ संविधानले फाइदा विदेशी महिलालाई

जनकपुरधाम, २५ माघ । ‘नेपालको संविधान’ जारी भएपछि नेपाली नागरिकसँग वैवाहिक सम्बन्ध कायम गरेकी विदेशी महिला जिल्ला प्रशासन कार्यालय धनुषाबाट वैवाहिक अङ्गीकृत नागरिकता लिई लाभान्वित हुँदै गइरहेका छन् ।

विदेशी महिलाले नेपाली नागरिकसँग विवाह गर्दा नेपाली नागरिकता प्राप्त नहुने सुनेपछि भारत सीतामढी जिल्ला बैरा ग्राम बस्ने २६ वर्षीया खरिदा खातुन चिन्तित थिइन् । तर आफ्ना श्रीमान् धनुषा बलाहा सघारा–५ बस्ने जैवीर राइनसँग कार्यालय पुग्दा बिनाझन्झट एक घन्टाभित्रै वैवाहिक अङ्गीकृत नागरिकता पाउँदा सबै हल्ला मात्र भएको उनले बताइन् ।

नेपालको संविधान जारी भएपछि कार्यालयबाट हालसम्म ५० भन्दा बढी नेपालीसँग विवाह गरेका विदेशी महिलाले अङ्गीकृत नागरिकता प्राप्त गरिसकेका छन् ।

त्यस्तै भारत सुरसण्डकी रामदुलारी देवी धनुषा शान्तिपुर–९ का रामअवतार महरासँग विवाह गरेको केही दिनमै सम्बन्धित निकायबाट वैवाहिक अङ्गीकृत नागरिकता पाउन सफल भइन् । संविधान जारी भएपछि विदेशी महिलाले नेपालीसँग विवाह गर्दा नागरिकता पाउन जटिल रहेको खबर सुन्दा इन्तु न चिन्तु भएकी भारत सीतामढी सुरसण्डकी नुरजहाँ खातुन क्षिरेश्वरनाथ नगरपालिका–२ का अहमद अन्सारीसँग विवाह गरी नागरिकता प्राप्त गरेपछि उनको चिन्ता हराएको छ ।

“नेपालको संविधानले विदेशी महिलाको हकमा कुनै किसिमको विभेद गरेको छैन” प्रजिअ रामप्रसाद थपलियाले भन्नुभयो– “नेपालमा विवाह गर्ने विदेशी महिलाले वैवाहिक अङ्गीकृत नागरिकता लिनेको सङ्ख्यामा वृद्धि भएको छ ।”संविधानको दफा ११ को उपदफा ६ अनुसार नेपाली नागरिकसँग वैवाहिक सम्बन्ध कायम गरेकी विदेशी महिलाले सङ्घीय कानुन अनुसार नेपालको अङ्गीकृत नागरिकता लिन सक्ने प्रावधान छ ।

नेपालीसँग वैवाहिक सम्बन्ध कायम गरेकी विदेशी महिलाले नागरिकता पाउन झन्झटिलो नरहेको बताउँदै प्रशासकीय अधिकृत दीपककुमार कर्णले भन्नुभयो, “यस प्रकारको नागरिकतामा सरलता आएकै कारण दैनिक तीनदेखि चार जना विदेशी महिलाले वैवाहिक अङ्गीकृत नागरिकता लिन आउने गरेका छन् ।”