विदेश मन्त्री स्वराज स्वदेश फिर्ता

काठमाडौँ, २६ माघ । दिवङ्गत नेपाली काँग्रेसका सभापति सुशील कोइरालाप्रति श्रद्धाञ्जलि अर्पण गर्न आज अपराह्न यहाँ आउनु भएकी भारतीय विदेश मन्त्री सुष्मा स्वराज आजै साँझ स्वदेश फर्कनु भएको छ ।

यहाँ उत्रेलगत्तै उहाँले दशरथ रङ्गशालामा पुगेर दिवङ्गत नेता कोइरालाप्रति श्रद्धाञ्जलि व्यक्त गर्नुभएको थियो ।

छोटो भ्रमणका क्रममा विदेशमन्त्री स्वराजले आजै राष्ट्रपति विद्यादेवी भण्डारीसँग पनि भेटवार्ता गर्नुभएको थियो ।

त्यसैगरी प्रधानमन्त्री केपी शर्मा ओलीसँग गर्नुभएको सङ्क्षिप्त भेटवार्तामा नेपाल–भारत सम्बन्ध, द्विपक्षीय हित र चासोका विषयमा छलफल भएको थियो ।