आतङ्कवादविरोधी अभियानमा खाडी मुलुकहरुको थप सहयोग चाहन्छन् ओबामा

रियाद (साउदी अरब), ९ वैशाख । अमेरिकी राष्ट्रपति बाराक ओबामाले साउदी अरबमा खाडी मुलुक राष्ट्र प्रमुखलगायतका नेतालाई बिहीबार भेट्नुभएको छ ।

अमेरिका र खाडी मुलुक तेलको मूल्यमा भएको गिरावटलाई उकास्न सँगसँगै काम गर्ने र तेलको मूल्यमा आएको गिरावटबाट परेका असरलाई विस्तारै कम गर्दै जाने अमेरिकी राष्ट्रपति ओबामाले रियादमा खाडी मुलुकका नेतासँगको भेटमा बताउनुभएको छ ।

अमेरिका र खाडी राष्ट्रहरुले छिट्टै आर्थिक विषयमा उच्चस्तरीय वार्ता गर्ने र यसले तेलको मूल्यमा देखिएको कमीलाई समायोजन गरी अमेरिकाको खाडी मुलुकसँगको ऐतिहासिक सम्बन्धलाई थप बलियो पार्ने कार्य गर्नेछन्, ओबामाले बताउनुभयो ।

खाडी मुलुकको विकासका लागि अमेरिका सधैँ सहयोगी रहनेसमेत राष्ट्रपति ओबामाको जोड थियो ।

भेटका क्रममा उहाँले इस्लामिक स्टेट समूहविरुद्धको लडाइँमा साउदी अरबलगायत अन्य खाडी मुलुकले पुरयाउँदै आएको सहयोगमा थप गरी आईएसविरुद्धको अभियानलाई मद्दत गर्न आग्रह गर्नुभएको अमेरिकी राष्ट्रपति ओबामाका निकट सहयोगी वेन रोडेजले बताउनुभयो ।

इरानलाई परमाणु गतिविधि नियन्त्रण गर्ने प्रयास स्वरुप लगाइएको नाकाबन्दीलाई इरान र विश्व शक्ति राष्ट्रबीच भएको परमाणु सम्झौतापछि रुष्ट देखिएका खाडी राष्ट्रका नेताहरुसँगको भेटमा राष्ट्रपति ओबामाले आतङ्कवादविरोधी अभियानमा पुराना सहयोगी साउदी अरबलगायतका खाडी मुलुकको सहयोगको प्रशंसा गर्नुभएको थियो ।

राष्ट्रपति ओबामा र साउदी राजा सलमानबीच भएको करिब दुई घण्टा लामो वार्तालाप खुला भएको ओबामाका सहयोगी रोडेसले बताउनुभयो ।

अमेरिकी राष्ट्रपतिले विशेष विषयलाई खासै नउठाए पनि ब्लगरहरुलाई दिइएको सजाय बारेमा भने चर्चा गर्नुभएको रोडेसले बताउनुभयो ।

सन् २०१२ मा साउदी ब्लगर राइफ बादाबीको पक्राउ र उनलाई एक हजार कोर्रा र १० वर्षको जेल सजायले विश्वव्यापीरुपमा चर्चा पाएको बताउँदै यसबारे चासो व्यक्त गर्नुभएको थियो ।

यसैबीच साउदी अरबका राजकुमार तथा पूर्व गुप्तचर प्रमुख टर्की अल फैसलले सीएएनएनलाई भन्नुभयो, अमेरिकी राष्ट्रपति ओबामाको व्यवहार र वचनबद्धतापछि साउदी अरबले अमेरिकामा पहिलोभन्दा व्यापक परिवर्तन आएको बताउनुभयो ।

खाडी मुलुक सधैँ अमेरिकामाथि आश्रित नरहने र अमेरिकी नेताहरुले जे भन्यो यसलाई सिधा बुझ्न अब सम्भव नहुने भन्दै दुई देशको सम्बन्ध दुवै देशको फाइदाका लागि हुनुपर्नेमा अल फैसलले जोड दिनुभयो ।

ओबामासँगै रियादमा पुग्नुभएका अमेरिकी रक्षामन्त्री एस्टन कार्टरले बुधबारले आफ्ना खाडी मुलुकका समकक्षीसँग आतङ्कवादविरद्धको लडाइँमा अहिलेको भन्दा थप सहयोग पुरयाउन आग्रह गर्नुभएको थियो ।