सरकारविरुद्ध अविश्वासको प्रस्ताव दर्ता

काठमाडौँ, २९ असार । नेकपा (माओवादी केन्द्र)ले सरकारका विरुद्धमा व्यवस्थापिका–संसद्मा अविश्वासको प्रस्ताव दर्ता गराएको छ ।

आज नयाँबानेश्वरस्थित संसद् भवनमा दर्ता गराएको सो अविश्वासको प्रस्तावको प्रस्तावकमा केन्द्रका अध्यक्ष पुष्पकमल दाहाल र समर्थनमा नेपाली काँग्रेसका सभापति एवम् प्रमुख प्रतिपक्षी दलका नेता शेरबहादुर देउवा रहनुभएको छ ।

सो अविश्वासको प्रस्तावमा नेका र केन्द्रका २५५ जना सांसदले हस्ताक्षर गर्नुभएको छ ।

अध्यक्ष दाहालसहित नेका संसदीय दलका प्रमुख सचेतक चीनकाजी श्रेष्ठ र केन्द्रका संसदीय दलका प्रमुख सचेतक हितराज पाण्डेले व्यवस्थापिका–संसद्का महासचिव मनोहरप्रसाद भट्टराईसमक्ष सो प्रस्ताव दर्ता गराउनुभएको हो ।

नेका प्रमुख सचेतक श्रेष्ठले प्रधानमन्त्री केपी शर्मा ओलीको नेतृत्वको वर्तमान सरकार नैतिक सङ्कटमा परेको भन्दै प्रधानमन्त्रीले राजीनामा दिन माग गर्नुभयो ।

केन्द्रका प्रमुख सचेतक पाण्डेले प्रम ओलीले पदबाट राजीनामा दिई नयाँ सरकार गठनका लागि मार्गप्रशस्त गर्न माग गर्नुभयो । रासस

व्यवस्थापिका संसद् सचिवालयमा सरकारको विरोधमा दर्ता आज भएको अविश्वासको प्रस्ताव परिपक्व हुन संसद् नियमावलीअनुसार एक साता लाग्नेछ ।
प्रधानमन्त्री केपी शर्मा ओली नेतृत्वको सरकारमा आफूहरुको विश्वास नरहेको भन्दै नेपाली काँग्रेस, नेकपा (माओवादी केन्द्र) र नेकपा (संयुक्त) ले अविश्वासको प्रस्ताव दर्ता गराएपछि सचिवालयका महासचिव मनोहरप्रसाद भट्टराईले सो जानकारी दिनुभएको हो ।
उहाँले नियम १६० को प्रयोग गर्ने सन्दर्भमा सभामुखले आफ्नो तजबिजीमा सो प्रस्तावलाई एक साताभित्र छलफलको प्रक्रिया अघि बढाउन सक्नुहुने बताउनुभयो । सो नियम सभामुखले निलम्बन गरेमा एकसाता नपुग्दै पनि प्रस्तावमा संसद्मा छलफल अघि बढ्न सक्नेछ । अविश्वास प्रस्ताव पारित भएमा नयाँ गठनको प्रक्रिया अघि बढ्नेछ ।
आज बिहान ११ बजेका लागि तोकिएको र ३ बजेसम्मको संसद्को आजको बैठक केहीबेरमा सुरु हुँदैछ । आजको कार्यसूचीमा अविश्वासको प्रस्तावको कार्यसूची छैन ।

प्रम ओलीको समर्थनमा राप्रपा