संसदीय समितिबीच समन्वय बढाउँदै सभामुख

काठमाडौँ, ३२ साउन । व्यवस्थापिका–संसद् मातहतका विभिन्न समितिबीच बेलाबेलामा देखापर्ने कार्यक्षेत्रसम्बन्धी अन्योल र विवाद चिर्न पहल सुरु भएको छ । सभामुख ओनसरी घर्तीले आज ती समितिका सभापति, संसद्मा रहेका दलका प्रमुख सचेतक, संसद् सचिवालयका महासचिव, सम्बन्धित सचिवसमेतसँग छलफल गरी त्यसको निदानका लागि पहल सुरु गर्नुभएको हो ।

संसदीय समितिमा उस्तै खालका विषय र मन्त्रालयका समस्याका सवालमा एकै पटक, दुई वा सोभन्दा बढी समितिले चासो दिने, बैठक र निर्णय गर्ने कतिपय अभ्यासका कारण सम्बन्धित सरकारी निकायलाई कसको निर्देशनलाई प्राथमिकता दिने भन्ने अन्योल हुने गरेको थियो । कतिपय अवस्थामा त एउटै विषयमा फरक फरक समितिका भिन्नभिन्न निर्देशन हुने भएका कारण समितिको औचित्यमा पनि प्रश्न उठ्दै आएको थियो ।

विशेष गरी सार्वजनिक लेखा समिति र अर्थ समिति तथा राज्य व्यवस्था समिति र सुशासन तथा अनुगमन समितिका कार्यक्षेत्र बाझिँदै आएका छन् । यस्तै उद्योग वाणिज्य तथा उपभोक्ता हित सम्बन्ध समिति र वातावरण संरक्षण समिति तथा विकास समिति र कृषि तथा जलस्रोत समितिका बीचमा पनि दोहोरोपन देखापर्ने गरेको छ । हाल संसद्मा ११ विषयगत र दुई विशेष समिति छन् ।

सभामुखलाई पहिलेदेखि यसमा चासो दिन सम्बन्धित सभापतिले आग्रह गरेकामा आज पहिलो पटक समन्वयको पहल भएकामा सकारात्मक रुपमा लिइएको छ । “समितिका कार्यक्षेत्र र कार्यसूचीमा दोहोरोपन कसरी देखा परेको हो ? यसको समाधानका लागि के गर्न सकिन्छ ?” सभामुख घर्तीले सभापतिलाई प्रश्न गर्दै भन्नुभयो, “यसले संसदीय समितिको प्रभावकारिता बढाउँदैन, जनताका सवाललाई सम्बधोन गर्न पनि हामी चुक्न सक्छौँ । यसमा हामी सबै गम्भीर बनौँ ।” सभामुखले सभापतिसँगको अर्काे बैठकमा यसबारे ठोस निष्कर्षमा पुग्नेगरी खाका ल्याउन निर्देशन दिनुभएको संसद् सचिवालयले जनाएको छ ।

सभामुख घर्तीले संसद् र समितिका निर्देशनको पालनाको पनि समीक्षा गर्न आग्रह गर्दै सम्बन्धित मन्त्री र सांसद्बीच सिधै प्रश्नोत्तरका लागि आफूले व्यवस्था गर्ने बताउनुभयो भने सचिवालय र समितिहरुमा हुने खर्च कटौतीका व्यवस्थामा सघाउन पनि आग्रह गर्नुभएको थियो ।

बैठकमा समाधानका उपायबारे सुझाव दिँदै अर्थ समितिका सभापति प्रकाश ज्वालाले विषय जुध्ने स्थिति भएमा एक सभापतिले अर्काे सभापतिसँग परामर्श गर्ने, कहिलेकाहीँ संयुक्त बैठक आयोजना गर्ने र त्यसका लागि सभामुखले पहल लिने गर्नुपर्ने बताउनुभएको थियो । उहाँले आजको छलफल सकारात्मक रहेको भन्दै यसले आपसी समन्वय बढाउने विश्वास व्यक्त गर्नुभयो ।

उद्योग वाणिज्य तथा उपभोक्ता हित सम्बन्ध समितिका सभापति भीष्मराज आङ्देम्बेले समितिले आफ्नो कार्यक्षेत्रमा काम गर्ने वातवरण बनाउनुपर्ने र कार्यक्षेत्र मिचिने सन्दर्भमा सभामुखले सहजकर्ताको भूमिका निर्वाह गर्नुपर्ने सुझाव दिइएको जानकारी दिनुभयो ।

समितिका निर्देशन कार्यान्वयनको अवस्था, समितिमा विज्ञताका आधारमा कर्मचारीको नियुक्ति, सांसद् र कर्मचारीको क्षमता अभिवृद्धि, समानुपातिकरुपमा तालिम, अध्ययन भ्रमणको व्यवस्थाका बारेमा पनि आज छलफल भएको थियो । संसद्मा रहेका अन्य समितिमा अन्तर्राष्ट्रिय सम्बन्ध तथा श्रम समिति, सामाजिक न्याय तथा मानवअधिकार समिति, महिला, बालबालिका, ज्येष्ठ नागरिक र समाज कल्याण समिति, सुरक्षा विशेष समिति, संसदीय सुनुवाइ विशेष समिति छन् ।