इस्तानबुलको रात्रि क्लबमा आक्रमण गर्ने समातिए

इस्तानबुल, ४ माघ । टर्कीको ठूलो सहर इस्तानबुलमा अवस्थित एक रात्रि क्लबमा आक्रमण गर्ने व्यक्ति समातिएको प्रान्तीय गभर्नरले मङ्गलबार जानकारी दिएका छन् ।

नयाँ वर्ष सुरु भएको दिनमा भएको यस आक्रमणमा कम्तीमा ३९ व्यक्तिको मृत्यु भएको थियो । रैइना नाम गरेको यस रात्रि क्लबमा भएको आक्रमणको १७ दिन पछाडि ती आक्रमणकारी समातिएको सरकारी स्रोतले जानकारी दिएको छ ।

अब्दुल्गादिर मशारिपोभ नामक उज्बेक नागरिकलाई इस्ताबुलको इसेनयुर्ट जिल्लामा रहेको अपार्टमेन्टबाट सोमबार राति पक्राउ गरिएको बताइएको छ ।

कारबाहीको क्रममा ती व्यक्तिसँग १ लाख ५७ हजार अमेरिकी डलर, दुई वटा चालकरहित विमानलगायत अन्य हतियारहरु भेटिएको बताइएको छ ।

ती व्यक्तिसँगसँगै एक इराकी पुरुष र अफ्रिकाको विभिन्न राष्ट्रका तीन महिलासमेत पक्राउ परेको जनाइएको छ ।