भवन निर्माण मापदण्ड अनुगमन गर्न कार्यदल

काठमाडौँ, १९ माघ । काठमाडौँ महानगरपालिकाले नगर क्षेत्रमा मापदण्डअनुरुप भवन निर्माण भए-नभएको अनुगमन तथा अनियमिततालाई नियन्त्रण गर्न सात सदस्यीय कार्यदल गठन गरेको छ ।

भवन निर्माण इजाजत महाशाखा प्रमुख राम कार्कीको संयोजकत्वमा आज बसेको बैठकले उक्त निर्णय गरेको हो । कार्यदलका सदस्यमा इ हिम्मत सिंह, केदार कार्की, कुन्दन अर्याल, विकल्प आचार्य र जीवन रेग्मी तथा सदस्यसचिवमा वीरबहादुर कार्की रहनुभएको छ ।

यसैबीच महानगरपालिकाले सार्वजनिक जग्गामा व्यवसाय सञ्चालन गर्नेलाई कानुनी आधारको प्रमाणपत्र पेस गर्न पत्राचार गरेको छ । महानगर–३० महाबौद्ध क्षेत्रमा राखिएका कपडा पसल हटाउन नपर्ने भए कारण, आधार र प्रमाणसहित महानगरमा लिखित जवाफ पठाउन यही माघ १० गते बसेको सम्झौता अध्ययन समितिको बैठकको निर्णयानुसार सात दिनको म्याद दिई माघ १३ गते पत्राचार गरिएको हो ।